Tokio Olimpiadasynda óner kórsetken qazaqstandyq sportshylar Riodaǵy sportshylardan eki jasqa úlken boldy. Ulttyq Olimpiada komitetiniń bas hatshysy Andrei Kriýkov jazǵy oiyndardaǵy sátsizdikterdiń sebebin taldai kelip, osyndai málimdeme jasady, dep habarlaidy QazAqparat.
«Olimpiada oiyndarynda 206 elden 11 324 sportshy qatysyp, 45 sport túri boiynsha 339 júlde jiyntyǵy sarapqa salyndy. Bul jerde sportshylarymyzdyń jasyn atap ótkim keledi. Bizdiń komanda Rio oiyndaryndaǵy komandaǵa qaraǵanda eki jasqa «qartaiyp» qalǵan bolatyn. Bul óte mańyzdy. Osy kórsetkish bizde sapaly rezerv joq ekenin kórsetedi. Iaǵni, ulttyq quramalardyń kósh basyndaǵy sportshylardy aýystyratyn sapaly rezerv joq. Osylaisha ulttyq qurama kóshbasshylary chempionattarda da júlde salady, Olimpiadalarǵa da qatysady. Sonda rezerv daiarlaý jumysy jetkiliksiz degen sóz», - dedi UOK bas hatshysy.
Onyń sózine qaraǵanda, pandemiia jospardy buzǵanyna qaramastan, qazaqstandyq sportshylar litsenziiany jetkilikti deńgeide utyp alǵan.
«Olimipiada oiyndaryndaǵy sport túrleri men medal utystarynyń qysqarýy, erejelerdiń ózgerýi qosymsha litsenziia alý múmkindigin qarastyrýǵa jol bermedi. Bul jerde olimpiada tsikli eki bólikten turatynyn aitý kerek. Birinshi bólik oiyndarǵa daiyndyqty qamtysa, ekinshi bólik Olimipiadada óner kórsetýmen tikelei bailanysty. Bul jerde bizge qatysy joq sebeptermen 33 litsenziia qysqartyldy. Olipiadanyń basqa sport túrlerinen nátijeni jaqsartý esebinen litsenziia alý jospary oryndalǵanyn aitý kerek. Pandemiiaǵa qaramastan osynsha litsenziia alǵanymyzdy sátti qadam dep baǵalaýǵa bolady», - dedi ol Ulttyq Olimpiada komiteti bas assambleiasynyń otyrysynda.
