Qazaqstan Prezidenti Qasym-Jomart Toqaev kadrlardy jasartýǵa baǵyttalǵan belsendi kadrlyq saiasat júrgize bastady. Memleket basshysynyń qyzmetke kiriskenine 100 kún tolýyna orai saiasi ǵylymdar kandidaty Andrei Chebotarev osyndai pikir bildirdi, dep habarlaidy QazAqparat.
«Memleket basshysy qoǵammen dialog ornatý úshin Ulttyq qoǵamdyq senim keńesin qurdy. Bizde buǵan deiin óńir-óńirlerde, ortalyqta buryn qoǵamdyq keńester kóp edi. Alaida, bul joly sapaly túrde jańa organ qurylǵanyn kórip otyrmyz. Bul organ Prezident óz aýzymen aitqan bastamalardy iske asyratyn bolady. Prezident sonymen birge kadrlardy jasartýǵa baǵyttalǵan belsendi kadrlyq saiasat júrgize bastady. Iaǵni, ol eski gvardiia men jas saiasatkerlerdiń úilesimin saqtap otyr. Jańa Saýda jáne integratsiia ministrligi men Ekologiia, geologiia jáne tabiǵi resýrstar ministrligi quryldy. Agenttik ekige bólindi. Bul da durys shara der edim. Sebebi, sybailas jemqorlyqqa qarsy kúres salasyn qalaida memlekettik kadrlardy daiarlaý salasynan bólip alý kerek», - dedi Andrei Chebotarev elordadaǵy Ortalyq kommýnikatsiialar qyzmetinde ótken «Qasym-Jomart Kemeluly Toqaev Prezidenttigi: alǵashqy 100 kún – maqsattar, qadamdar, taktikasy» atty dóńgelek ústel otyrysynda.
Sarapshynyń aitýyna qaraǵanda, Prezidenttik jastar rezerviniń qurylýy da kadrlardy jasartýǵa baǵyttalǵan.
«Prezident beibit sherýler týraly zańnamany jetildirý jóninde birneshe márte málimdegen bolatyn. Suhbatynda da ol týraly aitqan. Iaǵni, Memleket basshysy qoǵamnyń belsendiligin baiqap, qatań sharalardyń qajeti joqtyǵyn bildirdi. Bul trend bastaldy. Iaǵni, atalmysh zańnama boiynsha jumys júrgizilýde», - dedi Andrei Chebotarev.
Aita ketsek, Qasym-Jomart Toqaevtyń Memleket basshysy retinde halyq aldynda ant berip, ulyqtaý rásimine qatysqaly beri búgin 100 kún tolyp otyr. Osy kúnder ishinde atqarǵan jumystarynyń videosholýyn myna siltemeden kórýge bolady.
