Foto: gov.kz
AMÓZ-diń burynǵy bas direktory Shýhrat Danbaiǵa qatysty qylmystyq iste sot kinásiz degen uiǵarym shyǵardy, - dep habarlaidy Massaget.kz portaly Atyraý qalasynyń №2 sotynyń baspasóz qyzmetine silteme jasap.
Atyraý qalasynyń №2 sotynda Atyraý munai óńdeý zaýytynyń ("AMÓZ" JShS) burynǵy bas direktory D. jáne satyp alý departamentiniń direktory S.-ǵa qatysty qylmystyq is qaralǵan.
"D. jáne S. aýyr saldarǵa alyp kelgen, ózderine paida alý maqsatynda qyzmet múddelerine qaishy, qyzmettik ókilettikterin paidalana otyryp, adamdarmen aldyn ala sóz bailasý arqyly qyzmet jaǵdaiyn teris paidalanǵandary úshin aiyptaldy (Qylmystyq kodekstiń 361-baby 4-bóligi 3-tarmaǵy). Sottalýshylarǵa 2019-2020 jyldary AMÓZ-de "Munaidy tereń óńdeý keshenin" salý kezinde JShS jarǵysynyń jáne reglamenttelgen sharttyń talaptaryn buzyp, merdigerden jetkizilgen aqaýly qurylǵynyń qunyn talap etý jóninde sharalar qoldanbaǵany nemese merdigerdiń kepildik mindettemeleri boiynsha osy qurylǵylardy aýystyrýdy talap etpegeni úshin aiyp taǵylǵan", - delingen sot habarlamasynda.
Osylaisha, tergeý derekteri boiynsha memleketke 2,9 milliard teńgeden asa zalal keltirilgen.
"Sot AMÓZ-da Keshen qurylysyn salý kezinde jumys kólemi ulǵaiǵanyn anyqtady. Bul rette merdigerler qosymsha shyǵyndarǵa ushyraǵan, bul memlekettik saraptamalardyń qorytyndylary arqyly rastaldy. Sondyqtan taraptar qosymsha sharttar jasasyp, oǵan sáikes kepildik kórsetkishterge qol jetkizilmegeni jáne anyqtalǵan aqaýlar úshin merdigerlerden somalar ustaldy. Budan basqa "QazMunaiGaz" AQ jáne "AMÓZ" JShS keshendi salý kezinde olarǵa zalal keltirilmegeni týraly anyqtama berdi", - delingen sot málimetinde.
Sot D. jáne S.-ny olardyń áreketterinde qylmystyq quqyqbuzýshylyq quramy bolmaýyna bailanysty barlyq epizod boiynsha kinásiz dep tanydy. Sot úkimi zańdy kúshine engen joq.
Eske salaiyq, buǵan deiin Atyraýda AMÓZ-diń burynǵy bas direktory Shýhrat Danbaiǵa aqaýy bar munai óńdeý kesheni nysanyn paidalanýǵa berý týraly buiryqqa qol qoiǵany úshin aiyp taǵylǵany habarlanǵan edi.
