Qazaqstannyń halyq ártisi Ámina Ómirzaqovanyń 100 jyldyq mereitoiy IýNESKO kóleminde atalyp ótiledi. Bul týraly búgin Ǵ.Músirepov atyndaǵy Qazaq memlekettik akademiialyq balalar jáne jasóspirimder teatry direktorynyń mindetin atqarýshy Azamat Satybaldy málim etti, dep habarlaidy "Ult aqparat".
"N.Nazarbaevtyń "Uly dalanyń jeti qyry" maqalasynda qazirgi ádebiettegi, mýzyka men teatr salasyndaǵy jáne beineleý ónerindegi tulǵalar beinesin jasaý kerektigi aitylǵan bolatyn. Osy "Uly tulǵalar" seriiasy aiasynda 2019 jyl Qazaqstannyń halyq ártisi, Memlekettik syilyqtyń laýreaty, sanaly ǵumyryn Ǵ.Músirepov teatryna arnaǵan sahnamyzdyń sańlaǵy Ámina Ómirzaqovanyń 100 jyldyq mereitoiyna orai sharalar IýNESKO kóleminde atalyp ótiledi. Bul qazaq teatry men kino óneri úshin rýhani jańǵyrýdyń eń úlken kórinisi sanalady", - dedi Azamat Satybaldy.
Aita keteiik, búgin QR Mádeniet jáne sport ministrliginde elimizdiń respýblikalyq teatrlarynyń basshylary baspasóz máslihatyn ótkizgen bolatyn. Baspasóz máslihaty barysynda M.Áýezov atyndaǵy Qazaq memlekettik akademiialyq drama teatry direktorynyń mindetin atqarýshy Sábit Ábdiqalyqov, Ǵ.Músirepov atyndaǵy Qazaq memlekettik akademiialyq balalar jáne jasóspirimder teatry direktorynyń mindetin atqarýshy Azamat Satybaldy, Respýblikalyq memlekettik akademiialyq korei mýzykalyq komediia teatrynyń direktory Liýbov Ni, Q.Qojamiiarov atyndaǵy memlekettik akademiialyq uiǵyr mýzykalyq komediia teatrynyń kórkemdik jetekshisi Murat Ahmadiev ótken jyly atqarǵan jumystary jaiynda esep berdi.
