Jiyrma jyl buryn amerikalyq otbasy asyrap alǵan qazaq jigiti týǵan áke-sheshesin izdeidi, dep habarlaidy "Ult aqparat".
Bul aqparat Facebook jelisindegi «Kazakh American Association» tobynda paida boldy. Noi Sak Marshall Qazaqstanda dúniege kelgen jáne ony amerikalyqtar eki jasynda asyrap alǵan.
«Meniń esimim Noi (Sultan Úmituly Karimov). Men 1999 jyly qarasha aiynda Almatyda dúniege keldim. Shamamen eki jarym jyldan keiin meni Almaty qalalyq №2 balalar úiinen asyrap aldy», – dep jazdy ol.
Anasynyń esimi belgili, onyń aty – Karimova Úmit Qalkenqyzy, al ákesi – Karimov Úmit Sákenuly.
Onyń aitýynsha, Karimova Úmit Qalkenqyzy esimdi áieldi Almatydan taba almaǵan.
Ol óziniń týystary týraly kóbirek bilgisi keledi.
«Men mektepte kóptegen tilderdi, sonyń ishinde orys tilin oqydym. Qazaq tilin ońai úirený úshin túrik tilin úirenip júrmin», - dep jazdy Noi.
QazAqparat redaktsiiasy qalalyq ákimdikke Noidyń ata-anasyn tabýǵa kómektesýdi surap, júgingen edi.
«Ókinishke orai, ákimdik adamdardy izdeýmen ainalyspaidy. Múmkin Almaty qalalyq Politsiia departamenti kómekteser», - dep jaýap berdi ákimdiktiń baspasóz qyzmetinen.
Redaktsiia qalalyq Politsiia departamentinen jaýap kútýde.
Eske salaiyq, byltyrǵy mamyr aiynda AQSh azamattary asyrap alǵan qazaq balasy Marat Toqtaruly Orazǵaliev (qazirgi esimi - Teodor Ýolton) áleýmettik jeliler arqyly Óskemen qalasyndaǵy týǵan-týystaryna izdeý salǵan bolatyn.
ShQO Bilim basqarmasynyń Qorǵanshylyq, qamqorshylyq jáne internat uiymdary bóliminiń mamandary izdestirý jumystaryn júrgizip, eki kúnnen keiin Teodor Ýoltonnyń týǵan aǵasyn taýyp berdi. Keiinnen aǵaiyndylardy bir-birimen bailanystyrdy.
