Vokal boiynsha amerikalyq kásibi maman Meri Tsimmer Dimash Qudaibergenniń Qytaidaǵy «Men ánshimin» baiqaýyndaǵy ónerin tamashalap, otandasymyzdyń vokaldyq qabiletine tánti bolǵanyn jetkizdi, dep habarlaidy QazAqparat tilshisi.
Meri Tsimmer YouTube jelisindegi óziniń jeke arnasynda álemdegi ártúrli ártisterdiń ónerine baǵa berip otyrady. Dimashtyń ónerin baǵalaý jóninde ánshiniń kóptegen jankúierleri qolqa salǵan kórinedi. Mýzykalyq sarapshy qazaq ánshisiniń shyǵarmashylyǵymen tanys emes eken.
Jattyqtyrýshy óziniń vokaldyq múmkindigi úsh oktavaǵa ǵana jetetinin moiyndaidy. Al Dimash alty oktavamen erkin án shyrqai alady.
«Men júzdegen adamǵa án aitýdy úirettim. Biraq olardyń bir de bireýi bes oktavada án aita almaityn. Shyn máninde, men oqytqan ánshilerdiń barlyǵynyń úsh nemese úsh jarym oktavalyq múmkindikteri bar. Áigili ánshilerdiń ózi ortasha vokaldyq diapazonda án shyrqaidy», - deidi ol.
Vokal mamany Dimashtyń eń joǵary nota - D8 (segizinshi oktavanyń re notasy) boiynsha án shyrqai alatyn qabiletine tańdanysyn jasyrmaidy.
«Mundai vokaldyq talant ekiniń birine buiyra bermeidi. Dimash - airyqsha vokaldyq aýqymnyń sirek kezdesetin iegeri. Ol sondai-aq ártúrli stildi biriktire alatyn keremet sheber», - dep atap ótti sarapshy.
Dimashtyń ózindik ereksheligi - tenormen, bariton jáne sopranomen án aita alýynda.
«Ómirimde 4 oktavalyq sopranomen án shyrqai alatyn bir ǵana óner iesimen kezdeskenim bar. Adamnyń dybystyq bailanysy mýzykalyq aspapqa uqsas. Ishek uzyn bolǵan saiyn dybys terbelisi soǵurlym jii. Dimashtyń ádetten tys vokaldyq bailamy bar. Ol, meniń oiymsha, juqa ári keń. Budan bólek, Dimash án aitý tehnikasynyń shynaiy sheberi», - dep esepteidi bloger.
Vokal muǵalimi Dimashtyń osyndai nátijelerge qol jetkize alýynyń birden-bir sebebi - klassikalyq jáne qazirgi zamanǵa sai ándermen óte kóp ýaqyt jumys isteýiniń arqasy dep esepteidi.
«Tipti, adam biregei darynmen dúniege kelse de, daýsymen shyndap jumys istemese, óneri sol kúii kómilip qalar edi», - dep qorytyndylady Meri Tsimmer.
