Ambýlatorlyq qyzmettiń júktemesi joǵary bolyp tur . Bul týraly «Ulttyq ǵylymi kardiohirýrgiia ortalyǵy» AQ basqarmasy tóraǵasynyń birinshi orynbasary Mahabbat Bekbosynova aitty, dep habarlaidy QazAqparat.
«Qazirgi ýaqytta simptomsyz jáne aýrý jeńil ótip jatqan patsientterdiń kúndelikti statistikasyn júrgizip otyrmyz. 15 myńǵa jýyq adam simpomsyz, 2 myńǵa jýyq aýrýdyń jeńil túri ótip jatqan patsient retinde baǵalanǵan. Ambýlatorlyq býynnyń jiti baqylaýy barysynda patsientterdiń shamamen 3 paiyzy statsionarǵa aýystyrylady. Mundai málimetter kún saiyn túsedi», - dedi ol.
Onyń atap ótýinshe, aýrýdyń alǵashqy belgileri baiqalǵan kezde tirkelgen meditsinalyq mekemege júginý qajet. Qazirgi ýaqytta meditsinalyq mekememen bailanysýǵa múmkindik beretin bailanys nómirleri barlyq jerde bar.
«Árine, ambýlatorlyq qyzmette belgili bir problemalardyń bar ekendigi jasyryn emes. Biz ambýlatorlyq býynda tek shuǵyl qaraýlardy ǵana qaldyryp, barlyq josparly keńes berýlerdi toqtatýdy ótindik. Óitkeni, búginde ambýlatorlyq qyzmettiń júktemesi joǵary bolyp tur. Kardiolog retinde kúretamyr qysymy nemese júrek tusynda aýyrsyný bolǵan kezde keńes qajet ekendigin túsinemin. Biraq, ol úshin arnaiy utqyr top qurylǵan. Buǵan qosa, COVID-19-ben ainalysatyn utqyr top ta bul aqparatty meditsinalyq-sanitarlyq alǵashqy kómekke bere alady», - dedi Mahabbat Bekbosynova.
Onyń aitýynsha, qazirgi ýaqytta jedel meditsinalyq kómek qyzmetiniń de júktemesi tym úlken bolyp tur. Bul qyzmetke bolmashy simptomy bar patsientter de óte kóp qońyraý shalady. Sonyń saldarynan shuǵyl kómek qajet etetin naýqastarǵa der ýaqytynda járdem berilmei jatady. Buǵan qosa aptasyna 24 saǵat jumys isteitin ambýlatorlyq qyzmet, iaǵni, meditsinalyq-sanitarlyq alǵashqy kómek deńgeiinde kezekshi brigadalar qurý qajet.
«Osyǵan bailanysty jedel meditsinalyq qyzmet óte aýyr sanattaǵy aýrýlar úshin shuǵyl jaǵdaida jumys isteýi tiis. Menińshe, osy sharalardy qabyldaý elimizdegi ahýaldy turaqtandyrýǵa múmkindik beredi», - dedi ol.
