Erlik kórsetip, Taldyqorǵanda órt shyqqan úiden eki kishkentai balany qutqarǵan 19 jasar stýdent Arman Baqytbaiulyna bilim granty beriledi. Bul týraly búgin Armandy qabyldaǵan Almaty oblysynyń ákimi Amandyq Batalov aitty.
Eske salsaq, Taldyqorǵan qalasynyń turǵyny, I. Jansúgirov atyndaǵy Jetisý memlekettik ýniversitetiniń 1 kýrs stýdenti Arman Baqytbaiuly keshe, 6 naýryzda kósheden ótip bara jatyp kóp páterli úidiń ekinshi qabatynan kómekke shaqyrǵan daýysty estidi, terezeden tútin shyǵyp jatqanyn kóredi. Arman gaz qubyrymen órmelep, esigi jabyq páterdiń ishinen terezeden eki kishkentai qyzdy alyp shyqqan. Kishkene balalardyń ata-anasy balalardy syrtynan jaýyp, jumysqa ketken eken. Oqiǵa ornyna órt sóndirýshiler der kezinde jetip, qajetti kómekti kórsetken.
Armannyń erlik áreketin estigen oblys ákimi A. Batalov stýdentti qabyldap, onyń ózinen oqý barysy, otbasylyq jaǵdaiy, ómirdegi qyzyǵýshylyǵy týraly surap bildi. Áńgime barysynda belgili bolǵandai, jas batyr ýniversitette dene shynyqtyrý jáne sport mamandyǵy boiynsha aqyly bólimde oqidy, qaryndasy ekeýin ákesi tárbielep otyr, sportqa jany jaqyn, fýtboldy jaqsy kóredi, buryn erkin kúrespen de ainalysqan. Ýniversitet rektory Qýat Baimyrzaevtyń aitýynsha, Arman jaqsy oqityn stýdentter qatarynda, sessiiany jaqsy kórsetkishtermen aiaqtaǵan. Rektor Armannyń erjúrektigine rizashylyǵy retinde jáne otbasylyq jaǵdaiyn eskerip, oqý aqysyn óziniń jeke esebinen kóterýge daiyn ekenin jetkizdi. Oblys ákimi bul usynysty qoldady, degenmen kelesi jańa oqý jylynan bastap Armanǵa oblys ákiminiń granty beriletinin aitty. Sol siiaqty mektepti aiaqtaǵan soń A. Baqytbaiulynyń qaryndasyna da qoldaý kórsetilmek.
- Erliktiń úlken-kishisi bolmaidy. Bireýdiń qaiǵysyna beijai qaramai, kómek qolyn sozǵanyń seniń úlken júrekti azamat ekenińdi kórsetti. Óziń sportpen ainalysasyń, salamatty ómir saltyn ustanady ekensiń. Sen siiaqty jastardan qatarlastaryń úlgi alýy tiis. Árqashan osyndai qarapaiym, baisaldy, meiirimdi qalpyńnan tanbai, arman-maqsatyńa jete ber! Saǵan árdaiym jaqsylyq tileimin! – dei kele, oblys ákimi A. Batalov Armanǵa noýtbýk syiǵa tartty.
