Búgin Memleket basshysy Qasym-Jomart Toqaev beinejazba arqyly «AMANAT» jastar qanatynyń kezekten tys VI Sezine qatysýshy delegattarǵa quttyqtaý sóz arnap, el jastaryna arnaiy úndeý joldady. Sezd barysynda jastar qanatyn transformatsiialaýdyń jańa baǵdarlamasy qabyldanyp, Ortalyq keńestiń quramy men jastar uiymynyń ataýy ózgertildi, dep habarlaidy "Ult aqparat" partiianyń baspasóz qyzmetine silteme jasap.
Aqmola oblysynyń Zerendi aýylynda ótip jatqan Sezdiń plenarlyq otyrysyna elimizdiń barlyq óńirinen 350-den astam delegat pen qonaq qatysty.
Plenarlyq otyrys barysynda Qazaqstan Prezidenti Qasym-Jomart Toqaev «AMANAT» partiiasy jastar qanatynyń kezekten tys VI Seziniń delegattaryna arnaiy úndeý joldady.
Onda Prezident Jańa Qazaqstannyń jastary airyqsha túsinýge tiis úsh mańyzdy baǵytty atady.
Olar – tereń bilim, eńbekqorlyq jáne otanshyldyq qasiet.
Birinshiden, Memleket basshysynyń aitýynsha, kózi ashyq, kókiregi oiaý azamattar eldi alǵa bastaidy, bolashaqtyń kilti tsifrlyq tehnologiia men innovatsiiada. Sondyqtan birneshe til bilip, túrli kásip igerý jastardyń qolynan keledi. Prezident atap ótkendei, elimiz básekege qabiletti bolýy qajet. Halqymyzdyń ál-aýqatyn arttyryp, turmys sapasyn jaqsartý kerek.
Memleket basshysynyń aitýynsha, bilimdi ári bilikti órender ǵana biik maqsatqa jete alady. Elge tirek bolý – árbir jastyń muraty. El jastardan tyń bastamalar jáne ozyq ideialar kútedi.
Ekinshiden, jastar adal eńbekti baǵalap, rýhy biik, sanasy sergek bolýǵa tiis. Jańa zamannyń jaqsy qasietterin boiǵa sińire otyryp, jahandanýdyń jaǵymsyz áserlerin de esten shyǵarmaý kerek. Memlekettik múdde bárinen biik turýy kerek ekenin aita kelip, Prezident árbir jasty ana tilin, ata dástúrin, tól tarihyn bilýge úndedi.
Úshinshiden, otanshyldyq qasiet týraly Memleket basshysy árkim qoǵam aldyndaǵy jaýapkershiligin tereń seziný kerek ekenin, týǵan elge qurmet jalyndy sózden emes, jasampaz isten kórinetinin, aldyna maqsat qoiǵan azamat naǵyz memleketshil tulǵaǵa ainalatynyn erekshe atap ótti.
Qasym-Jomart Toqaev sózin qorytyndylai kele, aǵa býynnyń jastarǵa zor úmit artatynyn, ony jastardyń aqtaitynyna senim bildirip, Sezd jumysyna tabys tiledi.
Óz kezeginde, jastar qanatynyń tóraǵasy Nurjan Jetpisbaev elimizdiń saiasi júiesiniń transformatsiiasy «AMANAT» partiiasynyń transformatsiiasynan bastalǵanyn atap ótti.
«Partiiany damytýdyń kezekti kezeńi onyń jastar qanatyn jańǵyrtý sanalady. Biz jastar men bilik arasyndaǵy ózara is-qimyldyń tiimdi arnasyna ainalǵymyz keledi. Barlyq óńirden kelip túsken usynystar negizinde qaita jandandyrý baǵdarlamasy ázirlendi. Sondai-aq uiymnyń Ortalyq keńesiniń quramy qaita qaraldy», – dedi Nurjan Jetpisbaev.
Plenarlyq otyrys barysynda sóz sóilegen mediavolonter Dias Kameridanov partiiaǵa barlyq tarihi qujattar men derekti filmder qazaq jáne aǵylshyn tilderinde tsifrlandyrylatyn «Tarih» biryńǵai platformasyn ázirleýdi usyndy. Bul Qazaqstan tarihyn didjitalizatsiialaýǵa jáne ony barshaǵa qoljetimdi etýge múmkindik beredi.
Partiia jastar qanatynyń Almaty qalalyq filialynyń volonteri Ariana Belobjitskaia eriktilerdiń 100 mektebin qamtityn Volonterler akademiiasyn qurýdy usyndy.
«Bul bir alańda túrli baǵyttaǵy eriktilerdi jinaýǵa múmkindik beredi. Olar jańa bilimdi, tájiribe men biliktilikterdi ala alady. Sheteldik sarapshylardan da úirenedi», – dep atap ótti ol.
Qańtar aiyndaǵy oqiǵalar kezinde áskeri qyzmette bolǵan aqtóbelik Ulan Myrzabaidyń aitýynsha, Otan qorǵaý – árbir qazaqstandyqtyń azamattyq boryshy.
«Jastardyń patriottyq tárbiesine erekshe nazar aýdarý qajet. Bul rette, partiianyń jastar qanaty júzege asyryp jatqan «Qaisar» jobasy burynǵydan da ózekti bola tústi. Biyl osy joba aiasynda el aýmaǵyndaǵy 2000-nan astam joǵary synyp oqýshysy qamtyldy. Osy baǵyttaǵy jumysty belsendi túrde jalǵastyrý kerek», – dedi Ulan Myrzabai.
Budan soń Soltústik Qazaqstan oblysy Ozernoe aýyly mektebiniń informatika pániniń muǵalimi Asyl Ahmetova sóz sóiledi: «Qazirgi ýaqytta jastardyń basym bóligi óz bolashaǵyn megapolistermen bailanystyratyny jasyryn emes. Alaida aýyl – halqymyzdyń besigi. Sondyqtan jastardy qoldaýǵa baǵyttalǵan baǵdarlamalar úlken qalalarmen shektelmei, aýyl jastaryna deiin jetýi tiis».
Asyl Ahmetova kóshpendiler murasy men túrki áleminiń qundylyqtaryn dáripteýdiń mańyzy zor ekenin atap ótti. Osy maqsatta, ár jyl saiyn túrli memleketterde ótkizilip kele jatqan Dúniejúzilik kóshpendiler oiyndaryn 2024 jyly qazaq dalasynda uiymdastyrýdy usyndy.
Sondai-aq, qoǵam qairatkeri Dáýlet Muqaev Sezd delegattary men qonaqtaryn «Aqyldy jas Azamat» jáne «AQYL BATTLE» jobalary týraly habardar etti.
EÝRO-2022-niń úzdik shabýylshysy atanǵan «Qairat» fýtzal klýbynyń shabýylshysy Birjan Orazov partiianyń jastar qanatynyń ataýyn ózgertýdi usyndy.
«Jańa Qazaqstandy óz Otanyn súietin, bilimdi, parasatty, daryndy, rýhty jastar quratyny sózsiz. Sondyqtan búgingi delegattarǵa partiianyń jastar qanatynyń ataýyn «Jastar Rýhy» dep ózgertsek degen usynysym bar», – dedi Birjan Orazov.
Bul sheshimdi is-sharanyń barlyq qatysýshylary qoldady.
«Rýh – halqymyz úshin kieli qundylyqtardy bildiretin uǵym. Bul ataý óte tereń maǵynaǵa ie, úlken jaýapkershilik júkteidi. Jańa ataý uiymnyń jumysyn da túbegeili ózgertýdi talap etedi. Iaǵni, jańartylǵan jastar qanaty jas urpaqtyń múddelerin shyn máninde qorǵaýy tiis», – dedi Májilis depýtaty Elnur Beisenbaev.
«AMANAT» partiiasy Saias keńesiniń múshesi, tanymal telejúrgizýshi Maqsat Tolyqbai partiia ataýyn ózgertý týraly usynysqa qoldaý bildirdi.
«Qazaq halqy áýelden rýh, namys uǵymdaryn airyqsha qasterleidi. Al rýhani bailyq degenińiz – ulttyq sana, til, dil. Eń úlken bailyǵymyz da osy adami kapital, rýhani qundylyqtar. El bolashaǵy bilimdi jastardyń qolynda. Babalar amanaty jas býyn bilim men eńbekqorlyqty úlgi ete alǵan kezde oryndalady. Jańa Qazaqstan – rýhani sabaqtastyq», – dedi Maqsat Tolyqbai.
Sezdi qorytyndylai kele, «AMANAT» partiiasynyń Tóraǵasy Erlan Qoshanov Jańa Qazaqstan bolashaq jastardyń igiligi úshin qurylyp jatqanyn atap ótti.
«Bul reformalardyń máni nede? Sizderdiń árqaisyńyzǵa – elimizdiń saiasi ómirine, bizneske, basqa da qoǵamdaǵy mańyzdy máselelerge erkin aralasý úshin teń múmkindik berý. Bir sózben aitqanda, bizdiń jastarymyz keleshekte ádiletti de ashyq qoǵamy bar qýatty Qazaqstanda ómir súrýleri kerek. Prezident bastamasymen osy ózgeristerdiń barlyǵy Konstitýtsiiamyzǵa engizildi, shegelendi, zańdastyryldy. Endigi kezekte osy reformalardy iske asyrýda – aldyńǵy qatarda jastar, árine sizderdiń bolýlaryńyz óte mańyzdy», – dedi Erlan Qoshanov.
«AMANAT» partiiasynyń Tóraǵasy jastar qanatynyń aldyna birqatar perspektivalyq mindet qoidy. Atap aitqanda, jastar problemalarynyń aimaqtyq kartalaryn engizý, daryndy jastar úshin jobalar jármeńkesin jáne basqa da is-sharalardy ótkizý, jas kóshbasshylarǵa arnalǵan oqý baǵdarlamalarynyń tiimdiligin arttyrý, NEET sanatyndaǵy jastardyń problemalaryn sheshý jónindegi jumysty kúsheitý, «Bir tolqynda» pikirtalas alańyn jáne JOO túlekterin jumysqa ornalastyrý boiynsha agenttik qurý.
VI kezekten tys Sezdiń sheshimimen jastar qanatyn transformatsiialaýdyń jańa baǵdarlamasy qabyldandy, jastar uiymynyń ataýy ózgertildi. Ortalyq keńestiń quramy qoǵamdyq pikirdiń belsendi kóshbasshylaryn, ÚEU ókilderin jáne t.b. tartý esebinen keńeitildi.
Foto: Áli Ǵalym
