QR Parlamentiniń Senaty jýrnalister arasyndaǵy «Amanat» baiqaýyna ótinimder qabyldaýdy bastady.
Bul jaiynda Senat tóraǵasy Máýlen Áshimbaev Facebook paraqshasynda jazdy, dep habarlaidy "Ult aqparat".
«Parlament Senatynyń uiymdastyrýymen ótetin jýrnalister arasyndaǵy «Amanat» baiqaýyna ótinimder qabyldaý bastaldy. Qazirgi tańda baiqaý komissiiasy qurylyp, oǵan birqatar Senat depýtattary múshe boldy. Onyń ishinde ózderi de belgili jýrnalister Nurtóre Júsip, Dana Nurjigitova jáne Aigúl Qapbarovanyń esimderin erekshe atap ótken jón», - dep jazdy Máýlen Áshimbaev.
Onyń atap ótýinshe, baiqaý barysynda Memleket basshysy qolǵa alǵan jańǵyrý baǵdarynyń iske asyrylý barysyn jáne zań shyǵarý qyzmetin saraptaityn úzdik materialdar anyqtalady.
«Biyl televiziia, baspasóz, radio jáne elektrondy BAQ salalaryna qatysty dástúrli júldelerden bólek, belgili qazaqstandyq jýrnalister Nurtileý Imanǵaliuly men Mihail Dorofeevti eske alýǵa arnalǵan arnaiy syilyqtar da taǵaiyndaldy», - dedi Senat tóraǵasy.
Aita keteiik, baiqaýdyń sharttary men talaptary Senattyń resmi saitynda tolyq kórsetilgen. Jumystar 19 mamyr men 10 maýsym aralyǵynda qabyldanady. Jeńimpazdardyń esimderi jýrnalister kúni qarsańynda belgili bolady.
