© RIA Novosti / Aleksandr Kriajev
Reseidiń Kemerovo oblysynyń burynǵy gýbernatory Aman Tóleev 79 jasynda qaitys boldy. Bul týraly qazirgi aimaq basshysy Sergei Tsivilev málimdedi, dep habarlady "Ult aqparat" RIA Novosti portalyna silteme jasap.
"1997 jyldan 2018 jylǵa deiin Kemerovo oblysynyń gýbernatory bolǵan Aman Tóleev ómirden ótti. Ol - búkil ómirin Kýzbass pen Reseige qyzmet etýge arnaǵan jarqyn, erekshe tulǵa", - dep jazdy Tsivilev Telegram jelisindegi arnasynda.
Ol Tóleevtiń ólimin orny tolmas qaza dep atap, oblys ómiriniń tutas bir dáýiri burynǵy gýbernatormen bailanysty ekenin aitty.
"Ol shahterler Transsibir temirjolyndaǵy kólik qozǵalysyn bógegen qiyn-qystaý kezeńde aimaqty basqardy jáne daǵdarystan alyp shyqty.
Kýzbastyqtar Aman Tóleevti óz qyzmetinde árqashan halyqtyń múddesin birinshi orynǵa qoiǵan naǵyz halyq gýbernatory retinde eske alady", - dep jazdy Tsivilev.
Aman Ǵumyruly Tóleev 1944 jyly Krasnovodsk (Túrikmenstan) qalasynda dúniege kelgen. Ákesi – qazaq. Baiuly taipasynyń Adai rýynan shyqqan.
Novovsibir temir jol injenerleri institýtyn (1973), Qoǵamdyq ǵylymdar akademiiasyn (1989) bitirgen. Eńbek jolyn 1964 jyly Kemerov oblysynda temirjolshy bolyp bastaǵan.
1997 jyldan bastap Kemerovo oblysynyń gýbernatory boldy. 3 ret (1991, 1996, 2000) RF Prezidenttigine kandidat bolyp tirkeldi.
Esterińizge sala keteiik, 2018 jyldyń 25 naýryzynda reseilik Kemerovodaǵy tórt qabatty «Zimniaia vishnia» saýda ortalyǵy órtke orandy. Órt oshaǵy joǵarǵy qabattan shyqqan, onda birneshe kinoteatr men balalar oiyn alańy ornalasqan. Órtten 64 adam qaza boldy. Qaitys bolǵandar tiziminde 41 bala boldy. Zardap shekkenderdiń jalpy sany 79-ǵa jetti.
Osy oqiǵadan soń Aman Tóleev óz erkimen otstavkaǵa ketý týraly ótinish jazdy.
