El Táýelsizdiginiń 30 jyldyǵy aiasynda «Adai ata-Otpan taý» tarihi-mádeni kesheninde yntymaq pen birlikke shaqyrar dástúrli meiram - Amal merekesi atalyp ótti, dep habarlaidy "Ult aqparat".
Búgin kóne jyl sanaý boiynsha Jańa jyldyń bastaýy Amal aiy kirdi.
Amal – eski jyldan jańa jylǵa aman jetken aǵaiynnyń arasyna syilastyqty darytatyn yntymaq pen birliktiń, tatýlyqtyń merekesi.
Mańǵystaýda dástúrli túrde toilanyp kelgen jalpyhalyqtyń meiram biyl koronavirýstyq infektsiianyń taralýyna jol bermeý maqsatynda toilanbady.
Iaǵni Otpantaýdyń basyndaǵy úlken jiyn ázir ótpeidi.
Degenmen birlik otyn jaǵý rásimi Mańǵystaý oblysynyń bas sanitar dárigeriniń qaýlysyna sáikes, barlyq karantin talaptaryn saqtai otyryp, shaǵyn toppen ótkizildi.
Sharaǵa Mańǵystaý oblysynyń ákimi Serikbai Trumov, óńirdiń ziialy qaýym ókilderi qatysty.
Merekelik kesh «Adai ata - Otpan taý» tarihi-mádeni kesheniniń Aqsarai mýzeiinde fotograf S.Maiemerovtyń «Mańǵystaýdyń fotoshejiresi» atty kórmesinen bastaldy.
Qarashańyraq alańynda oblys ákimi Serikbai Trumov, keshen ideiasynyń avtory Sabyr Adai bastaǵan azamattar Táýelsizdiktiń 30 jyldyǵyna orai 30 tal ekti.
Birlik pen izgiliktiń, turaqtylyq pen tatýlyqtyń belgisine ainalǵan Birlik otyn jaǵý rásiminde óńir basshysy atalmysh meiramnyń mán-maǵynasyna toqtalyp, jinalǵandardy Amal merekesimen quttyqtady.
«Byltyr álemdi sharpyǵan qaýipti indettiń órshýinen dástúrge ainalǵan «Birlik otyn» jaǵýǵa múmkindik bolmady. Halyqtyń amandyǵy men saýlyǵy basty nazarǵa alyndy. Eldi birlikke shaqyratyn, ortaq múddege uiystyratyn jaqsy dástúr úzilip qalmas úshin biyl barlyq sanitarlyq talaptardy saqtai otyra, shekteýli adammen «Birlik Otyn» tutatqaly otyrmyz. Bul - Halqymyzdyń bostandyqqa, Elimizdiń Egemendike jetý jolynda janyn qiǵan babalar rýhyna taǵzym. Táýelsiz Qazaqstan birliginiń simvoly! Ejelden jańartý men jasampazdyqtyń bastaýy, eldik pen birliktiń, yrys pen berekeniń arqaýy bolǵan Amal qajyrly eńbekterińizge tolaǵai tabys ákelsin!»,-dedi S.Trumov.
Otpan taýdyń baýyrynda birlik oty jaǵylyp, aqsaqaldar batasyn berdi.
Shara sońynda Balyqshy ata urpaqtary Alaý jaǵý estafetasyn Jemenei rýynyń ókilderine saltanatty túrde tabystady.
Oblystyq ardagerler qoǵamynyń beldi múshesi Salamat Nurov Amal merekesin bala kúnnen toilap keledi.
14 naýryz kúni qazanǵa sońǵy súr salynyp, dastarqan jaiylatyn. Aldymen úidiń úlkenderimen kórisedi de, aǵaiyndy aralaýǵa shyǵady.
«Negizi kórisý sol shańyraqtyń ózinen bastalady. Áýeli áke-sheshemizge kórisemiz. Sosyn apa, aǵa-jeńgelerimizge kórisemiz. Tek ata men kelin kórispeidi, qaiynaǵa men kelin kórispeidi. Ol endi bizdiń dástúrimizde joq. Biraq olar ádemi etip sálem etedi. Kórisýdiń tárbielik máni zor. Kópten kórmegen týysty izdep, baýyrmaldyqty nyǵaitýǵa, ókpe-renishteri bolsa, tatýlasyp, araqatynasty jaqsartýǵa múmkindik týady. Kórisý merekesin asyǵa kútetin ár shańyraq qurt-maiyn qoiyp, qonaǵyn qarsy alady. Bir-birine syilyq syilap, iltipatyn bildiredi», - deidi oblystyq ardagerler qoǵamynyń múshesi Salamat Nurov.
Amal kúni Samarqanda kók tas balqyp, eń qatal adamdar da bir-birine degen júregindegi óshpendilikti joiyp, bir-birin keshirip, qushaqtasady.
Bul arabtyń Hamal degen aiyna bailanysty aitylǵan. Jyl on eki aida 12 jerden shyǵyp, 12 jerge batady.
Árine, belgili qashyqtyqty saqtai otyryp. Osy ár aidyń atyna olar at qoiǵan. Sonyń birinshisi, jańa jyl aiynyń basy ál-Hamal dep atalady.
Osy aiǵa bailanysty qazaqtar Amal dep ketken muny. Oidaǵy-qyrdaǵy aǵaiynmen qushaqtasyp, kórisý úshin Atyraý men Altai, Arqa men Alataý arasyndaǵy alty Alashtyń balalary jylda Mańǵystaýdaǵy eń biik jer – Otpantaýdyń basyna jinalady.
