9 qyrkúiek, jeksenbide Altynbek Sársenbaiulynyń jaqyndary, izbasarlary Almatydaǵy Medeý muz aidyny jolyndaǵy «Prosveshenets» shipajaiynan Qumbel shatqaly baǵytynda taýǵa shyǵyp, «Altynbek soqpaǵymen» júrdi. Qumbel taýyn betke alyp Kókjailaýǵa qarai asatyn 15 shaqyrymǵa sozylatyn «Altynbek jolyn» 60 shaqty adam basyp ótti. Eske alýshylarǵa joldyń sońy bolǵan Kazachka shatqalynda jyldaǵydai as berildi.
«Altynbek Sársenbaiuly atyndaǵy qoǵamdyq qory» jyl saiyn 12 qyrkúiek kúni saiasatker, kórnekti memleket jáne qoǵam qairatkeri Altynbek Sársenbaiulynyń týǵan kúnine orai dástúr boiynsha saiasatkerdi eske alý sharalaryn uiymdastyrady. Marqumnyń arýaǵyna taǵzym etiledi.
Eske alý sharasy aiasynda saiasatkerdiń úzeńgiles serikteri, jaqyndary, shákirtteri Sársenbaiulynyń stýdenttik kezinen qalyptasqan daǵdysy boiynsha Kókjailaýdy asyp qaitady.
Saiasatker ylǵi da Medeý shatqalynan Kókjailaýǵa asyp, Alma-arasan shatqalyna qarai jaiaý serýen jasap turǵan. Tipti, Reseide Elshi qyzmetinde bolǵanda da Almatyǵa joly túsken demalysynda Alataýǵa shyǵyp qaitatyn. Ómiriniń sońǵy jyldarynda aptasyna bir ret taý asyp kelýdi ádetke ainaldyrypty. Jalǵyz Kókjailaý emes, Shalkódege, Qaiyńsaiǵa, Alataýdyń ásem tabiǵatyna jii serýen qurǵan. Tipti, 2005 jyly Altynbek Sársenbaiuly aýyldastarymen júzdesip: «Bir muratym – alystan aibarlanyp kórinetin Labasy shyńyna shyǵý. Dám tartsa, keler jyldyń jazynda júzege asyrsaq», – degen eken. Alashtyń aibarly Altekeńi 2006-nyń jazyn kóre almai ketti. 2006 jyly 11 aqpanda Sulýsaida qastandyqqa ushyrap qaza tapty. Alaida Labasy shyńyn Altekeńniń izbasarlary birneshe márte baǵyndyrǵan. Altynbekti ardaqtaityn halqy Qumbeldiń etegindegi onyń soqpaǵymen de jyl saiyn júredi. Biyl eske alýshylar «Altynbek jolyn» 13-inshi márte basty.
Aita ketetin bolsaq, 12 qyrkúiek kúni saǵat 11:00-de Keńsai-2 ziratynda Altynbek Sársenbaiulynyń arýaǵyna táý etilip, quran baǵyshtalady.
