Elbasy qory úzdik ádebi shyǵarmalardyń avtorlaryn marapattady, dep habarlaidy "Ult aqparat" qordyń baspasóz qyzmetine silteme jasap.
Nazarbaev ortalyǵynda V «Altyn tobylǵy» ádebi baiqaýynyń jeńimpazdaryn marapattaý rásimi ótti.
«QR Tuńǵysh Prezidenti - Elbasynyń Qory bul baiqaýdy jyl saiyn 18 ben 35 jas aralyǵyndaǵy jas aqyn-jazýshylar arasynda ótkizedi. Joba qazirgi zaman ádebietine qyzyǵýshylyqty arttyryp, jastardyń shyǵarmashylyǵyn shyńdaýǵa baǵyttalǵan. Jyl saiyn baiqaýǵa qyzyǵýshylyq artyp keledi. Biyl 170 jumys usynyldy, al 2015 jyly 120 jumys tapsyrylǵan bolatyn» delingen habarlamada.
Úzdik shyǵarmalar «Jyldyń úzdik prozasy», «Jyldyń úzdik poeziiasy», «Jyldyń úzdik balalarǵa arnalǵan shyǵarmasy», «Jyldyń úzdik dramatýrgiiasy» jáne Jastar jylyna arnalǵan arnaiy júlde «Uly dalanyń jasampaz urpaǵy» atty bes nominatsiia boiynsha anyqtaldy.
Qazylar alqasynyń quramyndaǵy elimizdiń belgili mádeni qairatkerleri, jýrnalister men jazýshylar usynylǵan jumystardy baǵalap, shyǵarmanyń kórkemdik stilin, emotsionaldy jáne estetikalyq áserdiń tereńdigin, avtorlar oiynyń júieliligin, ideiasynyń ózindik ereksheligin baǵalady.
Marapattaý rásiminde QR Tuńǵysh Prezidenti-Elbasy Qorynyń atqarýshy direktory Áset Isekeshev baiqaýdy qorytyndylap, jastarǵa tilegin jetkizdi: «Búgin biz júzden júirik, myńnan tulpar shyqqan jeńimpazdardy marapattaimyz. Elbasy Nursultan Ábishuly Nazarbaev «Bolashaqqa baǵdar: Rýhani jańǵyrý» maqalasynda «Salt-dástúrlerimiz, ádebietimiz, ulttyq rýhymyz boiymyzda máńgi qalýǵa tiis» degen edi. «Uly Dalanyń jeti qyry» maqalasynda da Elbasy rýhaniiatqa kóp kóńil bóldi. Uly halyqty ózderińizdei talantty urpaǵy jasaidy. Búginde elimizde daryndy jastarǵa qoldaý myqty. Elbasy Qory qashanda shyǵarmashyl jastardy qoldap, túrli baiqaýlardy úzdiksiz ótkizýde. Aldaǵy ýaqytta da Qor bul jumysty jalǵastyrady. Sizderge shyǵarmashylyq shabyt tileimin! Qazaq kórkem sóz óneriniń sheberleri kóbeie bersin!».
Úzdik shyǵarmalardyń avtorlaryn Áset Isekeshev, QR Parlamentiniń depýtattary, kórnekti qoǵam qairatkerleri, mádeniet jáne óner qairatkerleri marapattady.
«Altyn tobylǵy» baiqaýynyń jeńimpazdary:
- «Jyldyń úzdik prozasy» nominatsiiasy - Qanat Ábilqaiyr, Doshan Jylqybai;
- «Jyldyń úzdik balalarǵa arnalǵan shyǵarmasy» - Marat Seiilhanov, Asylan Tilegen, Miras Asan.
Joǵaryda atalǵan jeńimpazdardyń árqaisysy 1 million teńgeden aldy.
Júlde qory 2 million teńgelik «Jyldyń úzdik poeziiasy» jáne «Jyldyń úzdik dramasy» nominatsiialarynyń jeńimpazdary - Bekzat Smadiiarov pen Arshyn Nurbaqov.
«Uly dalanyń jasampaz urpaǵy» nominatsiiasyn Nurtas Turǵanbek jeńip aldy. Oǵan 3 million teńgeniń sertifikaty tapsyryldy.
