"Altyn Ordada" adam ólimine ákelgen tóbelesten keiin 28 jastaǵy er adam ustaldy, - dep habarlaidy Tengrinews.kz Almaty oblysynyń politsiia departamenti baspasóz qyzmetine silteme jasap.
Vedomstvo málimetinshe, "Altyn Orda" bazaryndaǵy tóbeles kezinde zardap shekken 23 jastaǵy jigit qaitys boldy. Ol sońǵy birneshe kún Almaty aýrýhanalarynyń birinde komada jatty.
Áleýmettik jelide maýsym ortasynda eki jigittiń tóbelesken videosy jariialandy. Kadrlarda jigitterdiń biri ekinshisiniń kiiminen ustap, tonaýshydan uialy telefonyn qaitaryp almaq bolǵan sáti túsirilgen. Nátijesinde kúdikti qarsylasyn eki ret uryp, oqiǵa ornynan qashyp ketedi.
Oblystyq densaýlyq saqtaý basqarmasynyń málimetinshe, naýqas 20 maýsymda Almatynyń kópsalaly klinikalyq aýrýhanasyna túsip, 8 shildede tańerteń qaitys boldy.
"Jedel-izdestirý is-sharasy barysynda politsiia qyzmetkerleri Jambyl oblysynyń týmasy, 28 jastaǵy kúdiktini anyqtady. Qazir kúdikti Qarasai aýdandyq politsiia basqarmasynyń ýaqytsha ustaý izoliatorynda jatyr. Oǵan qatysty QK-niń 192-baby 3-bóligi 1-tarmaqshasy "Abaisyzda jábirlenýshiniń ólimine alyp kelgen densaýlyqqa aýyr ziian keltire otyryp jasalǵan qaraqshylyq" boiynsha qylmystyq tergeý júrgizilip jatyr", - dep habarlady Almaty oblysy PD bastyǵynyń orynbasary, politsiia podpolkovnigi Eldar Ábdikenov.
Tártip saqshylarynyń aitýynsha, Almaty oblysynyń jedel qyzmetkerleri kúdiktini kórshi oblysta jasyrynyp júrgen jerinen ustap alǵan. Qazir tergeýge qajetti barlyq áreket júrgizilip jatyr, onyń qorytyndysy boiynsha qysqa merzimde protsestik sheshim qabyldanady.
