"Altyn Orda" bazarynda saýda oryndaryn joǵary baǵada jalǵa bergen. Bul týraly Básekelestikti qorǵaý jáne damytý agenttigi málimdedi, - dep habarlaidy "Ult aqparat".
Vedomstvo málimetinshe, "Altyn Orda QazTrade LTD" JShS-niń qyzmetin saýda naryǵyna qatysty básekelestik zańnamany saqtaý turǵysynan tekserý nátijeleri boiynsha ákimshilik is qozǵaldy.
"Óńirlik prokýratýranyń qaýlysy negizinde Almaty oblysy boiynsha monopoliiaǵa qarsy Departament mamandary 2022 jylǵy naýryzda "Altyn Orda QazTrade LTD" JShS qyzmetin tekserýge qatysý barysynda "Altyn Orda QazTrade LTD" JShS buiryǵyna sáikes, saýda ornyn kúndelikti jalǵa alý baǵasy júk kóliginen 15 000 teńgeni, KAMAZ jáne MAN avtokólikterinen - 7000-8000 teńgeni, Sprinter avtokóliginen - 6000-7000 teńgeni, GAZel avtokóliginen - 5000 teńgeni, jeńil avtokólikterden 3500 teńgeni quraityny anyqtaldy.
Almaty oblysy boiynsha monopoliiaǵa qarsy Departament naýryz aiynda óńirdiń geografiialyq shekarasy boiynsha kóterme-ámbebap naryqtarda kóterme satý úshin saýda oryndaryn usyný qyzmetteri naryǵyndaǵy básekeles ortanyń jai-kúiine taldaý jáne baǵalaý júrgizdi. Taldaý nátijesinde "Altyn Orda QazTrade Ltd" JShS 100% úlesimen monopoliialyq jaǵdaiǵa ie ekeni anyqtaldy" - delingen habarlamada.
Osy naryqtyń mańyzdylyǵy jáne saýda oryndaryna baǵanyń joǵary bolýy azyq-túlik ónimderine, onyń ishinde áleýmettik mańyzy bar azyq-túlik taýarlary baǵasynyń ósýine ákelip soqtyratynyn eskere otyryp, saýda naryǵynyń áreketterinde monopoliialyq joǵary baǵany belgileýge jáne ustap turýǵa baǵyttalǵan ústem nemese monopoliialyq jaǵdaidy teris paidalaný boiynsha básekelestikti qorǵaý salasyndaǵy zańnamany buzý faktileri anyqtalǵan.
Tekserý qorytyndysy boiynsha 2022 jyldyń mamyr aiynda "Altyn Orda QazTrade LTD" JShS-ne qatysty ákimshilik is qozǵaldy. Materialdar Almaty oblysy Qarasai ákimshilik quqyq buzýshylyqtar jónindegi mamandandyrylǵan aýdanaralyq sotyna joldanǵan.
