10 qazan kúni Polshanyń Gdansk qalasynda «Altyn adamnyń álem mýzeilerine sherýi» atty halyqaralyq joba aiasynda «Uly dala murasy: zergerlik óner jaýharlary» kórmesi ashyldy.
Atalmysh kórmeni Polsha Respýblikasynyń Gdansk mýzeii men Qazaqstan Respýblikasy Ulttyq mýzeiimen birlesip uiymdastyryp otyr.
Qazaqstan Respýblikasy men Polsha Respýblikasy arasyndaǵy diplomatiialyq qarym-qatynastar ornatylǵannan beri 25 jyl ishinde elderimiz yntymaqtastyqtyń barlyq baǵyttarynda eleýli tabystarǵa qol jetkizdi jáne ony beibitshilik, qaýipsizdik pen turaqtylyq múddesinde eki el halqynyń igiligi jolynda odan ári nyǵaitýdy kózdeidi.
Kórmeniń ashylý saltanatyna Polsha Respýblikasyndaǵy Qazaqstan Elshisi Marǵulan Baimuhanov, Gdansk qalasynań vitse-meri Petr Voichýk, QR Mádeniet jáne sport ministrligi Mádeniet jáne óner isteri departamenti direktorynyń orynbasary Maqsat Arǵynbekov, K. Aqyshev atyndaǵy institýt direktory Maral Habdýlina jáne Ulttyq mýzei mamandary qatysty. Shara barysynda arnaiy baspasóz konferentsiiasy uiymdastyrylyp, «Altyn adamnyń álem mýzeilerine sherýi» jobasy týraly jan-jaqty aqparat berildi.
Qazaqstan Respýblikasynyń Polsha Respýblikasyndaǵy Tótenshe jáne Ókiletti elshisi Marǵulan Baqytuly Baimuhan: «Qos memlekettiń Táýelsizdik jolyndaǵy tartysqa toly taǵdyry bir-birine uqsaidy. Sondyqtan da bolar, halyqtarynyń túsinigi ortaq, nieti bir. Qazaqstan-Polsha arasyndaǵy búgingi dostyq qarym-qatynas eki eldiń ózara syilastyǵynyń kórinisi bolsa kerek. Bul kórme Polsha Táýelsizdiginiń 100 jyldyǵy men Astana qalasynyń 20 jyldyǵyna orai uiymdastyrylyp otyr. Polsha Eýroodaq keńistigindegi «Altyn adam» ákelingen alǵashqy memleket ekenin atap ótken jón», - dedi.
Ótken shirek ǵasyr ishinde elderimiz arasynda qalyptasqan qarym-qatynas serpini taraptardyń Qazaqstan-Polsha yntymaqtastyǵyn dáiekti túrde damytýǵa umtylysyn kórsetedi. Jyl ótken saiyn qos memleket arasyndaǵy saiasi, saýda-ekonomikalyq jáne mádeni-gýmanitarlyq bailanys barlyq baǵyttarda jáne oń nátijelermen damyp keledi.
QR Mádeniet jáne sport ministrligi Mádeniet jáne óner isteri departamenti direktorynyń orynbasary Maqsat Arǵynbekov: «Bul sharanyń negizgi maqsaty – kórermenderdi Eýraziia beldeýindegi uly dala mádeni muralarymen tanystyrý. Kórmeniń basty eksponaty – «Altyn adam» jáne «Sarmat jaýyngeri». Sonymen qatar HIH-HH ǵasyrlarǵa tán áielderdiń áshekei buiymdary qoiyldy. Jalpy kórmege QR Ulttyq mýzeii qorynan 298 eksponat usynyldy», - dedi óz sózinde.
«Altyn adamnyń álem mýzeilerine sherýi» halyqaralyq kórme jobasynyń negizgi maqsaty – sheteldik kórermenderdi erte temir dáýirindegi Eýraziia Uly Dala beldeýiniń mádeni murasymen tanystyrý. Kórmede QR Ulttyq mýzeii qorynan b.z. deiingi VII-III ǵasyrlarǵa jatatynaltyn buiymdar kollektsiiasy men Esik qorǵanynan tabylǵan saq jaýyngeri tolyq kiimmen tanystyryldy.
«Altyn adamnyń álem mýzeilerine sherýi» halyqaralyq kórme jobasynyń marshrýtyna TMD, Aziia, Eýropa jáne Amerika elderi kiredi. Júzege asyrý merzimi: 2018-2021 jyldar.
Sonymen qatar 2018 jyly «Altyn adamnyń álem mýzeilerine sherýi» Halyqaralyq kórme jobasy Koreia Ulttyq mýzeiinde (Seýl q. Koreia) ótkiziledi. 2019 jyly atalmysh kórmeni Japoniia, Grýziia, Ulybritaniia, Ispaniia jáne Túrkiia memleketteriniń mýzeilerinde ótkizý josparlanyp otyr. 2020 jyly AQSh, Italiia, Avstriia, Frantsiia jáne Germaniia mýzeilerinde ótkizý josparlanǵan.
«Uly dala murasy: zergerlik óner jaýharlary» kórmesi 2018 jyldyń 10 jeltoqsanyna deiin jalǵasady.
