«Rýhani jańǵyrý» baǵdaralmasy aiasynda QR Mádeniet jáne sport ministrligi júzege asyryp jatqan «Altyn adamnyń álem mýzeilerine sherýi» halyqaralyq jobasy aiasynda Máskeýde ejelgi dala órkenietiniń biregei murasy usynyldy, dep habarlaidy "Ult aqparat".
Halyqtyq jáne sándik-qoldanbaly ónerdiń búkilreseilik mýzeii Qazaqstan Respýblikasy Ulttyq mýzeiimen birlesip uiymdastyryp jatqan «Uly dala murasy: zergerlik óner jaýharlary» kórmesine kelgen Máskeý turǵyndary men qonaqtary Qazaqstanyń nyshany retinde búkil álemge tanymal bolǵan «Altyn adam» eksponatyn tamashalaýǵa múmkindik aldy.
Sonymen qatar kórmege Qazaqstan Respýblikasy Ulttyq mýzeiiniń qorlarynan HIH ǵasyr men HH ǵasyrdyń ortasyna deiingi ýaqytqa jatatyn kúmisten jasalǵan áielder áshekeileri, bizdiń zamanymyzǵa deiingi VII-III ǵasyrlarǵa tiesili altyn buiymdar qoiylǵan. Tanystyrýǵa qoiylǵan jádigerlerdiń jalpy sany 170-ten asady.
Kórmeniń saltanatty ashylý rásiminde sóz sóilegen Qazaqstannyń Resei Federatsiiasyndaǵy Tótenshe jáne ókiletti Elshisi Imanǵali Tasmaǵambetov kelýshiler nazaryna usynylyp otyrǵan artefaktiler saq mádenietiniń zoomorftyq «ań» stilin pash etetindigimen biregei sanalatyndyǵyn basa aitty.
«Sizderdi osynaý kórmede qarsy alý - biz úshin úlken mártebe. Bul kórme biregei sanalady. Sebebi Esik qorǵandar kesheni men «Altyn adam» - bul elimizdiń eń myqty tarihi-mádeni eskertkishteriniń biri. Qazirgi Qazaqstan aýmaǵy - bul 8 ǵasyrdan bastap bizdiń zamanymyzǵa deiin saq mádenietiniń qalyptasyp, odan ary damyǵan keńistigi. (...) Kóshpeliler, saqtar osynaý mádeniettiń tasymaldaýshylary retinde óte bai tarihi mura qaldyrdy. Degenmen, ókinishke orai aýmaly-tókpeli zaman sol artefaktilerdiń azdaǵan bóligin ǵana búgingi kúnge deiin saqtaýǵa múmkindik berdi. Aita keterligi, «Altyn adam» 4 myń altyn buiymdar túrinde tabyldy. Bul - Esik kesheni qorǵandarynyń qaptaldaǵy qorymynyń birinen ǵana alynǵan buiymdar», - dedi Elshi.
RF Mádeniet ministriniń birinshi orynbasary Vladimir Aristarhov Máskeýde ashylǵan kórme «Altyn adamnyń» álemdik sherýiniń bastaýy ekendigin atap ótti.
«TMD elderimen mádeni alys-beris pen yntymaqtastyq Resei Federatsiiasy Mádeniet ministrligi jumysynyń basymdyǵy sanalady. «Altyn adamnyń álem mýzeilerine sherýi» halyqaralyq jobasynyń birinshi kórmesiniń Máskeýde ótýi biz úshin zor mártebe. «Altyn adamnyń» tabylýy 20 ǵasyrdaǵy arheologiia salasynyń eń iri oqiǵalarynyń biri bolyp tabylady», - dedi Vladimir Aristarhov.
Al RF Prezidentiniń halyqaralyq mádeni yntymaqtastyq jónindegi arnaiy ókili Mihail Shvydko búgingi kórmeden qazaq memleketiniń shyǵý tegin, halyqtyq tanymy men mádenietin kórýge bolatyndyǵyn basa aitty.
«Búginde biz sońǵy jyldary eldiń qalai qarqyndy damyp kele jatqanyna jáne onda Prezident Nursultan Nazarbaev qandai mańyzdy rólge ie ekendigine kýámiz. «Altyn adam» eldiń bai-baqýatty damý tumaryna ainalsyn», - dedi ol.
Aita keterligi, kórme 13 mamyrǵa deiin jalǵasady. «Altyn adamnyń álem mýzeilerine sherýi» halyqaralyq kórme jobasynyń marshrýtyna Shyǵys Aziia (Japoniia men Koreia), Eýropa (Avstriia men Frantsiia), sonymen qatar TMD elderi men AQSh kiredi.
Jobanyń maqsaty Eýraziianyń Uly Dala beldeýiniń bai mádeni murasymen sheteldik qoǵamdastyqty tanystyrý.
