QR Mádeniet jáne sport ministri Aqtoty Raiymqulova elimizdiń mýzei isi mamandaryn Halyqaralyq mýzei merekesimen quttyqtady, dep habarlaidy "Ult aqparat".
«18 mamyr – búkilálemdik qaýymdastyq úshin erekshe kún. Bul kúni Halyqaralyq mýzei merekesi atap ótiledi. Mýzeiler mádeni, tarihi jáne kórkem murany saqtaidy. Mýzeiler árbir adam balasy úshin demalys jáne ózin-ózi jetildirý orny. Mýzeilersiz qoǵamnyń intellektýaldyq, mádeni, bilim berý deńgeiin kóterý múmkin emes. Iaǵni, mýzeiler óz eliniń jáne álemdik órkeniettiń mádeni jáne rýhani murasyn súiýge jáne túsinýge úiretedi», - dedi ministr.
Onyń atap ótýinshe, halyqaralyq kórmelik jobalar qazaqstandyq kórermenderge sheteldik mýzeilerdiń túrli mańyzdy kórmelerimen tanysýǵa múmkindik berdi. Atap aitqanda, Memlekettik Ermitaj, Tretiakov galereiasy, Frantsiianyń Ulttyq mýzeileriniń birlestigi – Grand Pale, Londonnyń Viktoriia jáne Albert mýzeii, Shensi provintsiiasynyń tarihi mýzeii (Siian q.), Islam mádenieti mýzeii (Kair q., Egipet), iske asyrǵan halyqaralyq jobalar aiasynda túrli kórkem jáne shyǵarmashylyq sharalar usynyldy.
Mýzeiler sonymen qatar Qazaqstannyń mádenietin shetelge tanystyryp keledi. «Rýhani jańǵyrý» baǵdarlamasy aiasynda ótkizilip kele jatqan eń jarqyn jobalardyń biri - «Altyn adamnyń álem mýzeilerine sherýi» sonyń aiǵaǵy. Úsh jyl ishinde «Altyn adam» álemniń 26 eliniń ulttyq mýzeilerinde kórsetildi.
«Koronovirýs pandemiiasyna bailanysty mýzeilerdiń onlain rejimde usynǵan belsendi jumysyn da erekshe atap ótý kerek. Osy kúnderi mýzeiler kelýshiler úshin virtýaldy keńistikte qoljetimdi boldy. Sonyń arqasynda biyl Nur-Sultan qalasyndaǵy QR Ulttyq mýzeii men Almaty qalasyndaǵy QR Ortalyq memlekettik mýzeii TMD elderi ishinde virtýaldy mýzeilerdiń úzdik bestigine endi. Sonymen qatar, biyl Qazaqstannyń mýzei isindegi teńdessiz flagmandardyń biri – Á.Qasteev atyndaǵy memlekettik óner mýzeiiniń ujymy 85 jyldyq mereitoiyn atap ótedi. Osy oraida barlyq mýzeilerdiń kásibi jáne shyǵarmashylyq belsendi komandasyna erekshe alǵys aitamyn jáne jumystaryna tabys tileimin. Otandyq mýzei ujymdary men ónersúier qaýymdy halyqaralyq mýzei kúnimen quttyqtai otyryp, barlyǵyńyzdy osy merekeni birge tamashalaýǵa shaqyramyn», - dedi Aqtoty Raiymqulova.
