Shyǵys Qazaqstandaǵy Sredigornoe aýylynda iz-túzsiz joǵalyp ketken eki jasar balany izdeý jumystary jalǵasyp jatyr.
Politseiler, qutqarýshylar, jergilikti organ qyzmetkerleri men eriktiler balany eki táýlikten beri izdep jatyr. Oqiǵa ornynda 200-ge jýyq adam júr.
"Qutqarýshylar jaqyn mańdaǵy aýmaqty túgel tekserýde: toǵai, shuńqyr, jerqoima, qiraǵan qurylystardy qarap shyǵyp jatyr. Bala turǵan úiden 20 metr jerdegi Berezovka ózeni qaýip týdyrady", - dep habarlady oblystyq tótenshe jaǵdailar departamentiniń baspasóz qyzmeti.
Óskemennen arnaiy kinologiialyq qutqarýshylar toby kelip jetken. Aspannan izdeý jumystary kvadrakopterdiń kómegimen júrgizilýde.
"Keshe jedel qutqarý tobynyń súńgýirleri ózen arnasyn eki toppen qarap shyqty. Kvadrakoptermen Berezovka ózeniniń aýmaǵyn joǵarydan zerttep jatyrmyz. Ózen jaǵalaýynyń mańynda Sredigornoe selosynan 5 shaqyrym jerde mobildi top quryldy", - deidi qutqarýshylar.
Eske sala keteiik, Álihan esimdi bala óz úiiniń aýlasynan joǵalyp ketken bolatyn. Anasynyń aitýynsha, ol aýlada 6 jasar ápkesimen oinap júredi. Bul ýaqytta anasy úlken qyzymen ashanada tamaq pisirip jatqan. Úige qyzy jalǵyz kiredi, inisin shaqyryp kelýge ketken úlken qyzy ony aýladan taba almaidy.
