Qala ákimi Altai Kólginov bir jarym apta buryn ashylǵan «Januia» otbasy institýtyn qoldaý ortalyǵynda azamattardy qabyldady, dep habarlaidy "Ult aqparat" qala ákiminiń baspasóz qyzmetine silteme jasap.
Ortalyqta «bir tereze» qaǵidasy boiynsha 70-ten astam memlekettik qyzmet kórsetiledi. Turǵyndar AÁK jáne bilim alý, jumysqa ornalasý, óz isin ashý, turǵyn úi baǵdarlamalaryna qatysý jáne taǵy basqa suraqtarǵa jaýap ala alady.
Azamattardy jeke qabyldaý barysynda oqýshylardyń ata-analary jalpyǵa birdei mindetti oqý qory aiasynda sertifikat alýdyń yńǵailylyǵyn atap ótti.
«Bul óte yńǵaily. Buryn sapasyz jáne keń kiimder keletin edi. Qazir mine biz ózimizge unaityn kiimdi, baǵasy men sapasyn salystyra otyryp, tańdaý jasai alamyz», - dedi qala turǵyndary.
Kóptegen azamattar turǵyn úi máseleleri boiynsha kelgen. Qala ákimi A. Kólginov eger jazda kezekte 46 myń adam tursa, qazir bul kórsetkish 47,5 myń adamǵa deiin artqanyn atap ótti.
«Turǵyn úi máselesi bir kúnde sheshilmeidi. Kezekte 47,5 myń adam tur. Birneshe turǵyn úi baǵdarlamasy bar. Olardyń biri - «Baqytty otbasy» baǵdarlamasy, nesie mólsherlemesi 2 %-dy quraidy. Kezekten tys páter berýge múmkindigimiz joq. Qujattardy jinaý, keńes berý, bilim berý jáne jumysqa ornalastyrý boiynsha kómektesemiz. Kelesi jyly biz elordada qoljetimdi turǵyn úi qurylysynyń kólemin 3 esege ulǵaitamyz. Biraq kezekte turǵandardyń sany da ósip kele jatqanyn túsiný kerek», - dedi A. Kólginov.
Sondai-aq, qabyldaý barysynda tórtinshi synyp oqýshysynyń anasy 1 qyrkúiekte ashylǵan №87 mektep-litseige balasyn jiberetini týraly sheshim qabyldandy. 9 apta ishinde qala ákimi 300-den astam adamdy qabyldady. Ótinishter boiynsha tiisti jumystar júrgizilýde.
