Elorda ákimi Altai Kólginov investorlardy qalalyq saiabaqtardy damytýǵa shaqyrdy, dep habarlaidy "Ult aqparat".
«Biz qalany «Nur-Sultan - jaily qala» tujyrymdamasyna sáikes damytyp jatyrmyz. Elorda ómir súrý úshin de, taza aýada serýendeý úshin qolailybolýy tiis. Senbi jáne jeksenik kúnderi áriptesterimmen qala saiabaqtaryn aralap shyqtym. Qoǵamdyq keńistikterde (saiabaqtar, gúlzarlar) jaǵdai jasap jatyrmyz. Jaiaý júrginshi jáne velesiped joldaryn tósep, sport túrlerimen belsendi ainalysý úshin alańdar ashyp jatyrmyz. Balalar úshin oiyn aimaqtaryn ornatyp jatyrmyz. Mundai jumystar qalanyń oramishilik aýmaqtarynda da júrgizilip jatyr», - dep jazdy qala ákimi Facebook paraqshasynda.
Onyń atap ótýinshe, áli de atqarar is jetip artylady. Máselen, elorda turǵyndary qalalyq saiabaqta attraktsiondar, akvapark, jaǵajai, bassein, kóńil kóterýge arnalǵan túrli aýmaqtar bolǵanyn qalaidy.
«Olardyń sanyn arttyryp qana qoimai, sapasyn da jaqsarta túsý qajet. Onyń ishinde jeke investitsiia tartý esebinen de. Investorlarymyzdy qalalyq saiabaqtardy damytýǵa qatysýǵa shaqyramyn. Senimdi basqarýǵa berýdi de qarastyrýǵa daiynbyz. Basty maqsat pen mindet - elorda turǵyndary men qonaqtarynyń taza aýada demalýyna sapaly oryn qurý. Bul oryndar otbasynyń barlyq múshelerin ózine tartatyn orynǵa ainalýy qajet», - dedi ol.
Elorda ákiminiń jazýynsha, «jasyl beldeý» aýmaǵynda jol-soqpaq jelisin jańǵyrtý jumystary júrgizilip jatyr. Osy aýmaqta skeitbording, rolik, tennis, fýtbol alańdary, balalar oinaityn aýmaq jasalady. Al «jasyl beldeýge» jaqyn ornalasqan ippodrom bazasy ippoterapiia, sporttyń ulttyq jáne klassikalyq túrlerin ótkizý jáne daiyndyq, atpen serýendeý baǵyttarynda damytylady.
«Álemdik indet ishki týrizmge munan da zor nazar aýdarymyz qajettigin kórsetip berdi. Qalalyq saiabaqtardy birlesip damytý úshin investorlarymyzdy shaqyramyn. Elordalyqtarǵa jáne qalaǵa qajetti ári qyzyqty jobalarǵa qoldaý kórsetemiz», - deidi Nur-Sultan qalasynyń ákimi.
