Almaty qalasynyń Medeý, Almaly, Jetisý aýdanyna qarasty birqatar turǵyn úiler men ózge de ǵimarattarǵa sýyq sý berý toqtatylady. Bul týraly «Almaty sý» memlekettik kommýnaldyq kásiporny málim etti.
«29 naýryzda saǵat 9:00-den 14:00-ge deiin Medeý aimaǵynda Baijanov - Qajymuqan - Nazarbaev kóshelerinde ornalasqan turǵyn úiler men basqa da nysandar sýyq sýdan ajyratylady», – dep habarlaidy «Almaty sý».
Sonymen qatar, 31 naýryz kúni tańǵy 9:00-den keshki saǵat 18:00-ge Almaly aýdanyna qarasty Qurmanǵazy - Shevchenko - Naýryzbai batyr – Seifýllin kóshesindegi úilerde sýyq sý bolmaidy. Sáýirdiń biri kúni - Maqataev - Raiymbek - Jeltoqsan – Seifýllin kóshesinde ornalasqan turǵyn úiler men basqa da nysandarǵa sýyq sý berý toqtatylady.
«1 sáýir kúni saǵat 9:00-den 18:00-ge deiin Jetisý aýdanynda ornalasqan Raiymbek - Seifýllin – Tobaiaqov (Temirjol vokzaly) - Abylai han kóshesiniń boiyndaǵy úiler men ákimshilik ǵimarattarǵa sýyq sý berý shekteledi», – delingen habarlamada.
Sýdyń berilmeý sebebi jańa sý qubyry jelisiniń qosylýyna bailanysty. Densaýlyq saqtaý, bilim berý jáne ózge de áleýmettik sala ǵimarattaryna sý avtotsisternalarmen jetkiziledi.
