Almaty ákimi Baqytjan Saǵyntaev BAQ ókilderine arnalǵan onlain brifingte qalaǵa qosylǵan eldi mekenderdi damytý týraly aitty, dep habarlaidy QazAqparat.
«Alǵabas» yqshamaýdanyndaǵy sýmen jabdyqtaý jáne sý burý jelileriniń qurylysy jalǵasyp jatyr. Qurylys-montaj jumystary aiaqtalǵan soń «Almatyinjstroi» AQ-nyń merdigerlik uiymy Oraqty batyr, Qara jorǵa, Aldiiar, Zulpyhar, Sámen batyr, Moldaǵulova, Estemesov jáne Kenjekei kósheleri boiyndaǵy joldardy inertti materialdarmen toltyratyn bolady.
«Alǵabas» yqshamaýdanynda 30,8 km jańa jol salýdyń qujattary daiyn, merdiger kompaniia anyqtalýda. Sýmen jabdyqtaý jáne sý burý jelilerin tartý, sondai-aq gidrotestileý jumystary aiaqtalǵannan keiin jol qurylysynyń jumystary bastalady. Jyl sońyna deiin aýdanda 10 shaqyrym jolǵa asfalt tóseý josparda.
«Barlyq kúshter jańa yqshamaýdandardaǵy injenerlik infraqurylymdy salýǵa jumsalýda.Sýmen jabdyqtaý jáne sý burý jelilerin, joldardy, syrtqy jaryq jelileri, áleýmettik nysandardyń qurylysy ótken jyly qabyldanǵan «Jańa Almaty» keshendi damý baǵdarlamasyna sáikes júzege asyrylady. Qalaǵa qosylǵan eldi mekender turǵyndarynyń ómir sapasyn bes jyl ishinde jaqsartýǵa trillion teńgege jýyq qarjy bólinedi. Bizdiń mindetimiz – 2023 jylǵa qarai barlyq yqshamaýdandar sýmen jáne káriz jelilerimen, sapaly joldarmen, balalardyń oiyn alańdarymen, saiabaqtar men skverlermen qamtamasyz etilýleri tiis», – dep atap ótti Baqytjan Saǵyntaev.
Megapolis ákiminiń tapsyrmasy boiynsha arnaiy jumys komissiiasy quryldy, ol qalaǵa qosylǵan jańa yqshamaýdandardyń máselelerin sheshýdi qolǵa alýda. Turǵyndardyń ótinishinen soń jospardan tys tekserý júrgizildi. Tekserý barysynda merdigerdiń jobadan aýytqyǵany, jumysty sapasyz atqarǵany, qurylys-montaj jumystarynyń tehnologiiasyn buzǵany anyqtaldy.
Jibergen kemshilikteri úshin «Almatyinjstroi» AQ-nyń merdigeri QR ÁqbK-niń 312-babynyń 1-bóliginiń 309 tarmaǵyna sáikes ákimshilik jaýapkershilikke tartyldy. Qoldanylǵan sharalardan soń merdiger olqylyqtardyń ornyn toltyrdy. Sonymen birge, «Kazgiprovodhoz institýty» óndiristik kooperativiniń jáne «Belko-Stroi» JShS-niń avtorlyq jáne tehnikalyq qadaǵalaýdy tiisinshe júrgizbegenderi úshin olar da QR ÁqbK-niń 317-babynyń 1-bóliginiń 1 tarmaǵy boiynsha ákimshilik jaýapkershilikke tartyldy.
Búginde merdigerdiń kúshimen Aldiiar jáne Jańa kóshelerine jol boiynsha qiyrshyq tas tóseldi. Qazirgi kezde Jańa qurylys kósheleri – 1, 2, 6, Aqseńgir, Babajanov, Kenjekei, Turan, Oraqty batyr, Kerimsal, Qazyna, Móńke bi, Muhitdinov, Sultan kóshelerine qiyrshyq tas qospalaryn tógý jumystary júrýde.
