Qala ákimi Baqytjan Saǵyntaevtyń tóraǵalyǵymen QR Densaýlyq saqtaý ministri A.Tsoidyń qatysýymen ótken alqaly jiynda megapolistiń COVID-19-ǵa qarsy is-qimyldyń júieli máseleleri, sondai-aq biyl 17 naýryzda ótken keńes barysynda Memleket basshysynyń bergen tapsyrmalarynyń oryndalý barysy qarastyryldy, dep habarlaidy "Ult aqparat".
Keńesti ashqan Baqytjan Saǵyntaev KVI pandemiiasymen kúres aiasynda qalanyń densaýlyq saqtaý júiesin kúsheitý boiynsha sharalar qabyldanǵanyn atap ótti. Jańǵyrtýdyń úsh jyldyq josparyna sáikes meditsinalyq jabdyqtardy jańartý, infektsiialyq statsionarlarǵa meditsinalyq gaz ornatý, sarqyndy sýdy zararsyzdandyrý men meditsinalyq qaldyqtardy kádege jaratý syndy keshendi jumystar júrgizilýde.
Sondai-aq, shahar basshysy ótken jyly KVI bar naýqastardy anyqtaý jáne olardy aýrýhanaǵa jatqyzý boiynsha algoritmniń ázirlenip, engizilgenin, AMSK jáne ambýlatoriialyq emdeýde asimptomatikalyq naýqastardy baqylaý boiynsha telemeditsina ortalyǵynyń jumysy qurylǵanyn atap ótti. Infektsiialyq tósek-oryndardyń qajetti rezervi quryldy. Dárihana jelisi men kovidtik gospitaldar úshin dárilik turaqtandyrý qory jumys isteidi.
Baqytjan Saǵyntaevtyń aitýynsha, qabyldanyp jatqan sharalar jaǵdaidy basqarýǵa, qalanyń densaýlyq saqtaý júiesine túsetin júktemeniń shamadan tys bolýyna jol bermeýge jáne statsionarlarǵa júktemeni eshelondaý qaǵidaty boiynsha bólýge múmkindik beredi.
Memleket basshysy alǵa qoiǵan mindetterdi oryndaý maqsatynda meditsinalyq-sanitariialyq alǵashqy kómek jumysyn kúsheitý, ana men balany qorǵaý, onkologiialyq aýrýlar men qan ainalymy júiesi aýrýlary kesirinen bolatyn ólim-jitimdi azaitý boiynsha sharalar qabyldanýda. Sonymen qatar, qala ákimi B. Saǵyntaevtyń tapsyrmasy boiynsha kórsetiletin meditsinalyq kómektiń sapasyn arttyrý jáne meditsina qyzmetkerleriniń kadr tapshylyǵyn sheshý boiynsha Jol kartasy ázirlendi.
Almaty qalasy ákiminiń orynbasary Erjan Babaqumarov rezervtik tósek-oryndardy kovidterge josparly túrde aýystyrý algoritmi qurylǵanyn aitty.
Qýattylyǵy 7011 tósekti quraityn 28 kovidtik klinika jáne 250 reanimatsiialyq klinika daiyndaldy. Búginde 5000 infektsiialyq jáne 220 reanimatsiialyq tósek-oryn jumys isteýde. RV-90 qalalyq juqpaly aýrýlar aýrýhanasynyń filialy paidalanýǵa berildi.
Jalpy qýaty 1080 oryndy eki jańa modýldik klinika salyndy. Mundai tósek-oryn qory táýligine 500-ge deiin naýqasty aýrýhanaǵa jatqyzýdy kózdeidi. Qalanyń barlyq meditsinalyq uiymdarynda úi-jailardy aimaqtarǵa bólý júrgizildi. Bul aýrýhanaishilik infektsiiany boldyrmaidy.
Pandemiiamen kúrestiń mańyzdy quramdas bóligi shuǵyl kómekti qajet etpeitin qala turǵyndaryna qashyqtan keńes berý arqyly kómek kórsetý úshin qurylǵan telemeditsina ortalyǵynyń jumysyn aitýǵa bolady. Búginde simptomsyz jáne jeńil KVI aǵymy bar 2,5 myńǵa jýyq adam operatorlarǵa táýlik boiy keńes berýmen jáne meditsinalyq qoldaýmen qamtylǵan. Patsientterdi ambýlatoriialyq baqylaý boiynsha qalalyq emhanalardyń mobildi brigadalarynyń jumysy jolǵa qoiyldy. Qala boiynsha 768 top jumyldyryldy. Kadrlyq rezerv qalyptasty. Juqpaly aýrýlar statsionarlarynda 2000-ǵa jýyq meditsina qyzmetkeri jumys isteidi. Rezervte – 2758 meditsina qyzmetkeri bar
Almatyda klinikalardy meditsinalyq ottegimen qamtamasyz etýdiń jalpyqalalyq baǵdarlamasy qabyldandy. Maqsaty – qalanyń 16 emhanasyn ottegimen 100% jabdyqtaý. 2020 jyly 6 klinika ottegimen tolyq jabdyqtalsa, biyl taǵy 10 klinikada ottegi stansalary bolady.
Densaýlyq saqtaý ministri Aleksei Tsoi Almatyda densaýlyq saqtaý qyzmetin damytý jáne COVID-19-ǵa qarsy kúres modeli elimizdiń basqa óńirlerine taralatynyn atap ótti. Mysaly, meditsinalyq kómek kórsetý standarttaryn saqtai otyryp, tósekterdiń ainalymyn jáne bosatylýyn qamtamasyz etýge múmkindik beretin statsionarlardy eshelondaý; aýrýdyń jeńil aǵymy bar asimptomatikalyq jáne naýqastardy baqylaýǵa múmkindik beretin telemeditsina ortalyǵynyń jumysy. Mundai ortalyq basqa óńirlerde joq.
Sonymen qatar, ministr sońǵy jyly jedel járdem avtoparkin 70%-ǵa jańartý, sondai-aq sońǵy 20 jylda Almatynyń meditsinalyq mekemelerinde bolmaǵan ottegi stansalaryn qosý jónindegi jumystyń mańyzdylyǵyn atap ótti. Sonymen qatar, A. Tsoi sáýir aiynda KVI-ǵa qarsy vaktsina dozalarynyń jańa partiiasy jetkiziletinin habarlady.
Sondai-aq jiynda Densaýlyq saqtaý vitse-ministri A. Ǵiniiat, QR Densaýlyq saqtaý ministrligi Sanitarlyq-epidemiologiialyq baqylaý komitetiniń tóraǵasy A.Esmaǵambetova, Qalanyń bas memlekettik sanitarlyq dárigeri, Almaty qalasy sanitarlyq-epidemiologiialyq baqylaý departamentiniń basshysy J. Bekshin, Almaty qalasy Qoǵamdyq densaýlyq basqarmasynyń basshysy N. Tabynbaev, telemeditsina ortalyǵynyń basshysy L. Myrzaǵali, Almaty qalasy JMJS direktorynyń mindetin atqarýshy P. Nadyrov sóz sóiledi.
Jiyn qorytyndysy boiynsha QR Densaýlyq saqtaý ministri A. Tsoi COVID-19-ǵa qarsy kúres jónindegi jumysty odan ári jalǵastyrý máseleleri boiynsha birqatar tapsyrmalar berdi.
