Almaty ákimdigi qalanyń fýnktsionaldyq aimaqtaryn damytý úshin qurylys reglamentterin jańartty, dep habarlaidy QazAqparat.
Almaty ákimi Erbolat Dosaev máslihat otyrysynda Abai dańǵylynyń ońtústigindegi, ál-Farabi dańǵylynyń soltústigi, Áshimov kóshesiniń shyǵysy jáne Shyǵys ainalma jolynyń shyǵys jaǵyndaǵy turǵyn úilerdiń biiktigin shekteýdi usyndy. Ol úshin 9 qabatqa deiin aýyspaly qabattar sanyna reglament belgileýge bolady.
Almaty qalasy ákiminiń orynbasary Muhit Ázirbaevtyń aitýynsha, qoldanystaǵy erejeler júzinde bul aýmaqtarda 12 jáne odan da kópqabatty turǵyn úiler salýǵa ruqsat bar.
«Tyǵyzdyqty azaitý maqsatynda atalǵan kóshelerdiń aýmaǵyndaǵy jańa turǵyn úiler qurylysy 3-sanatty jailylyqtan tómen bolmaýy kerek», - dedi ákim orynbasary.
Onyń aitýynsha, jobada ákimshilik nysandarmen qatar turǵyn úi salý qarastyrylǵan kezde, qosymsha norma aralas dep atalatyn keshendi qurylysta 9 qabattan joǵary ǵimarattar salýǵa ruqsat beredi. Bul jaǵdaida turǵyn úi kólemi jobanyń jalpy alańynyń 30%-ynan aspaýy kerek.
«Qala qurylysy erejelerin iske asyrý josparyna engizilip jatqan ózgeristerdi qoldaýyńyzdy suraimyn, ony qabyldaý arqyly qalanyń joǵarǵy bóligindegi qurylys tyǵyzdyǵyn azaitamyz, taý bókterinde turatyn turǵyndardy qorǵaimyz», - dedi Muhit Ázirbaev.
