Almaty qalasynyń ákimi Baqytjan Saǵyntaev jumys sapary barysynda qoǵamdyq keńistikti abattandyrý jáne kógaldandyrý jónindegi jobalarmen tanysty, dep habarlaidy "Ult aqparat".
Qala ákimdiginiń baspasóz qyzmetiniń habarlaýynsha, jobalar «Jumyspen qamtýdyń jol kartasy» baǵdarlamasy aiasynda júzege asyrylady. Qoǵamdyq keńistikti abattandyrý jáne kógaldandyrý boiynsha jobalardy iske asyrý kezinde «Jańa Almaty» shaǵynaýdany basty nazarda bolady.
«Bir ǵana Alataý aýdanynda birden 20 joba josparlanǵan. Onyń ishinde «Qarasý» shaǵynaýdanynda rekreatsiialyq aimaq qurylysy, «Shapaǵat» jáne «Zerdeli» shaǵynaýdandaryndaǵy skverlerdi jóndeý jumystary bar. Mundai jumystar basqa aýdandarda da júrgiziletin bolady», – dep atap ótti B. Saǵyntaev.
Shahar basshysynyń aitýynsha, qala turǵyndarynyń ýaqyttaryn qolaily ótkizý úshin jaiaý júrginshiler aimaǵyn jáne kóppáterli turǵyn úilerge irgeles aýmaqtardy abattandyrý, balalar alańdary men aýladaǵy sport alańdaryn salý, aryq júiesi men jaryqtandyrýdy jóndeý jumystary qarastyrylǵan.
«Oryndyqtar, jaryq kózderi (fonarlar) sekildi bezendirý elementteri yńǵaily ári qala turǵyndaryna uzaq ýaqyt qyzmet etýi úshin joǵary sapaly materialdardy paidalanýdy qamtamasyz etý kerek. Sondai-aq, bul jabdyqtar qazirgi jáne jańadan qurylǵan qalalyq keńistikterdiń sáýlettik kelbetine sáikes bolýy tiis», – dedi ákim.
«Eldi mekenderdi abattandyrý» baǵyty boiynsha 12,5 myń jumys ornyn qamtityn 125 joba iske asyrylatyn bolady. Jalpy, aǵymdaǵy jyly JQJK aiasynda 214 joba boiynsha 26 myń adam jumysqa ornalasady.
