Almatyda jańa kólikterdi onlain tirkeý qyzmeti iske qosyldy, dep habarlaidy QazAqparat.
Kóligin onlain rásimdegen almatylyq Baqyt Beisenáli búgin qaladaǵy №2 mamandandyrylǵan HQO-dan daiyn bolǵan qujattaryn aldy.
«Kóligimdi onlain tirkeý qiyndyq týdyrar dep oilaǵam. Aitarlyqtai qiyn bolmady. Jeke kabinetime kelgen avtosalon jibergen ótinimmen tanysyp, jańa kóligime nómir tańdadym. Banktik kartochkamen memlekettik baj salyǵyn jáne tirkeý alymyn tólep, ótinimdi rastadym. Bar bolǵany osy. Daiyn degen habarlamany alǵan soń, nómirlik belgini alýǵa keldim. Bas aiaǵy bir saǵatta jumysym bitti. Ortalyqtaǵy mamandarǵa da rahmet, barlyq qyzmetti joǵary deńgeide kórsetti», - deidi Almaty qalasynyń turǵyny Baqyt Shabanuly.
Jańa kólik iesi atanǵan taǵy bir azamat Nuraly Ahmetbaev ta onlain rásimdeýdiń qolaily ekenin aityp, zamandastaryn úiden shyqpai qyzmet alýǵa shaqyrdy.
Aita keteiik, bul qyzmet túri osy aptanyń basynda iske qosyldy. QR Tsifrlyq damý, innovatsiialar jáne aeroǵarysh ónerkásibi ministrligi, QR Ishki ister ministrligi, «Azamattarǵa arnalǵan úkimet» MK KE AQ jáne «Ulttyq aqparattyq tehnologiialar» AQ birlesip iske asyrǵan serviste, ázirshe Qazaqstan aýmaǵynda jasalǵan, sondai-aq Eýraziialyq ekonomikalyq odaqqa kirmeitin elderden ákelingen avtomobilderdi onlain tirkeýge bolady.
«Jańa kólikti onlain qalai tirkeimiz», - dep telefon soǵyp suraýshylar kóp edi. Endi ol da sheshimin tapty», - deidi «Azamattarǵa arnalǵan úkimet» MK Almaty qalasy filialynyń PR-menedjeri Jańyl Ápetova.
Onyń aitýynsha, endi avtokólik satyp alý jóninde kelisim jasalǵannan keiin avtosalon ókili VIN-kodty, sondai-aq klienttiń JSN-y kórsetilgen qajetti qujattaryn bekitip, eGov portaly arqyly avtokólik quralyn tirkeýge ótinim beredi. Bul ótinim satyp alýshynyń jeke kabinetine kelip túsedi. Satyp alýshy eGov portalyndaǵy jeke kabinetine kirip, ótinimmen tanysady. Avtomobilge arnalǵan memlekettik nómirlik belgini tańdai otyryp, memlekettik baj salyǵyn jáne tirkeý alymyn tóleidi jáne óziniń elektrondyq tsifrlyq qoltańbasymen (ETsQ) qol qoiyp, ótinimdi rastaidy. Satyp alýshy daiyn tehnikalyq qujat pen nómirlik belgini tiisti habarlama kelgen soń, birneshe saǵattan keiin mamandandyrylǵan HQO-dan óz betinshe ala alady.
«Tótenshe jaǵdai kezinde elektrondyq úkimet portaly arqyly resimdelgen daiyn qujattar men nómir belgilerin Almaty qalasy Mailin kóshesi, 85 mekenjaiyndaǵy №2 Mamandandyrylǵan HQO-dan alýǵa bolady. Budan basqa, aldyn ala resimdelgen senimhat boiynsha qujattardy jáne memlekettik nómirdi úige jetkizý qyzmetin paidalanýyna bolady»,– dedi Jańyl Ápetova.
