Almaty ákimi Baqytjan Saǵyntaev qalanyń COVID-19 pandemiiasynyń yqtimal jańa tolqynyna daiyndyǵy týraly aityp berdi, dep habarlaidy "Ult aqparat".
Qala ákimi Saǵyntaev osymen toǵyzynshy ret «Almaty» arnasyndaǵy Akimat Live baǵdarlamasynyń tikelei efirine qatysyp, onyń barysynda qalalyqtardyń ózekti suraqtaryna jaýap berdi.
Onyń aitýynsha, densaýlyq saqtaý júiesiniń tiimdiligin arttyrý boiynsha birqatar pármendi sharalar qabyldandy. Jedel járdem qyzmeti men alǵashqy meditsinalyq-sanitarlyq kómektiń jumysyn kúsheitýge basymdylyq berildi.
Budan bólek, kovidti aýrýhanalardyń tósek-oryndyq qýaty birtindep artýda. KVI-men kúreste ashylatyn medmekemelerdi eskere otyryp, 7226 oryndy 32 statsionar daiyndalýda.
Buryn josparlanǵanyndai, qazan aiynda 1 myń adam qabyldaýǵa qaýqarly jańa medmekemeler ashylady. Mysaly, 500 oryndy RV-90 jańa infektsiialyq aýrýhana daiyn. 300 tósek-oryndy ekinshi modýldi infektsiialyq gospital paidalanýǵa beriledi. Bulardan ózge, jeke investitsiialar esebinen 215 oryndy eki tolyqqandy kovidti klinikalar qurylatyn bolady.
Baqytjan Saǵyntaev infektsiialyq aýrýhanalarda jumys isteitin kadrlardy daiarlaý týraly da aitty. Qalada barlyǵy Qoǵamdyq damý basqarmasyna baǵynyshty 74 uiym, 20 respýblikalyq jáne 93 jekemenshik meditsinalyq mekemeler bar. Bul uiymdarda nebári 38 myńnan astam qyzmetker jumys isteidi.
1 tamyzdaǵy jaǵdai boiynsha COVID-19 emdeýge densaýlyq saqtaý júiesiniń 27 uiymy jumyldyryldy, 6200 tósek-oryn qoiyldy. Sol kezde infektsiialyq statsionarlarda 4035 qyzmetker jumys istedi.
Búgingi kúni epidemiologiialyq ahýaldyń turaqtanýyna bailanysty kópsalaly klinikalar ózderiniń ádettegi jumys rejimine kóshti. Koronavirýs infektsiiasyn emdeitin infektsiialyq klinikalarda qazirgi kezde 93 naýqas bar, 400-ge jýyq dáriger, medbike men meditsinalyq qyzmetker jumys istep jatyr.
Pandemiianyń jańa tolqyny bolǵan jaǵdaida 5,5 myń meditsinalyq qyzmetker rezervte tur. Meditsinalyq joǵary oqý oryndarynyń oqytýshylary, rezidentteri men intern-dárigerler arasynan rezerv quryldy, olardyń sany 450-ge jýyq.
Jańa klinikalardy kadrlarmen qamtamasyz etý úshin kadr resýrtaryn josparlaý jáne boljaý boiynsha jumystar júrip jatyr, jańadan qosylatyn infektsiialyq klinikalardyń shtattyq kestesi eseptelýde.
Mysaly, arnaiy áleýmettik qyzmet kórsetý ortalyǵynyń bazasynda jańadan ashylǵan 500 tósektik infektsiialyq statsionardyń jumys isteýi úshin shtat kestesine sáikes 587 shtat birligi qajet, búgingi kúni onyń kadrlarmen jaraqtanýy 70%-dy quraidy. «Halyq Arena» bazasyndaǵy klinikada 700-den astam meditsina qyzmetkeri iriktelip alyndy.
Jańadan ári jedel salynyp jatqan modýldi statsionarǵa 300 tósek-oryn, 280-ge jýyq meditsina qyzmetkeri qajet. Búgingi kúni shtattyq keste jasalýda jáne kadrlyq rezerv arasynan mamandar iriktelýde.
Búgingi kúni qalanyń meditsinalyq uiymdaryna reanimatolog, infektsionist, epidemiolog, pýlmonolog siiaqty mamandar jetispeidi.
Sonymen qatar, qala ákiminiń málimeti boiynsha meduiymdardyń materialdyq-tehnikalyq bazalary aitarlyqtai kúsheitildi. Máselen, 52 ÝZI apparaty, 38 rentgen, 269 ÓJJ apparaty, 5 KT, 2 MRT apparaty satyp alyndy. Bularǵa qosa, kópsalaly meditsinalyq tósekter, 250 tósek janyndaǵy monitor, zerthanalyq qurylǵylardyń 43 birligi, 1050 ottegi kontsentratory alyndy. Jedel járdem qyzmetiniń avtoparki 35 avtomashinaǵa jańardy, jyl sońyna deiin jedel járdemniń taǵy 100 kóligi alynatyn bolady. Birinshi eshelondaǵy segiz statsionarǵa meditsinalyq gazdyń 24 myń tósek-oryndyq ortalyqtandyrylǵan júiesi ornatylýda.
