Qazaqstanda halyqty emhanaǵa tirkeý naýqany bastalady. Jyl saiyn ótkiziletin dástúrli shara biyl 15-qyrkúiekten 15-qarashaǵa deiin ótedi. Bul týraly «Áleýmettik meditsinalyq saqtandyrý qory» kommertsiialyq emes aktsionerlik qoǵamy Almaty qalalyq filialynyń direktory Tileýhan Ábildaev aitty, dep habarlaidy QazAqparat.
Spikerdiń sózinshe, osy joly almatylyqtar 73 bastapqy meditsinalyq-sanitarlyq kómek uiymyna tirkelýge múmkindik almaq. Onyń ishinde 40 emhana memlekettik, 33-i – jekemenshik klinikalar.
«Tirkeý naýqany kezinde azamattar ózi turatyn aýmaq sheńberindegi memlekettik qana emes, jekemenshik klinikalarǵa da tirkele alady. Ol úshin emhana Meditsinalyq saqtandyrý qorynyń jetkizýshiler tiziminde bolýǵa tiis», – deidi ol.
Aita keteiik, biylǵy naýqan barysynda emhana aýystyrǵan azamattar ózi tańdaǵan emdeý mekemesiniń qyzmetin 2022 jyldan bastap paidalana alady. Jalpy, emhana aýystyrý mindetti emes. Burynǵy emhana qyzmetine kóńili tolatyn azamattar ári qarai da burynǵy klinikanyń qyzmetin paidalana berse bolady.
Emhana ózi qyzmet kórsetetin aimaqtan tys jerde turatyn azamattardy, sondai-aq, bastapqy meditsinalyq-sanitarlyq kómek kórsetetin mekeme júktemesi shekten asyp ketken jaǵdaida tirkeýden bas tartýy múmkin. Qoldanystaǵy normativterge sáikes, ýchaskedegi jalpy praktika dárigerine tirkelgender sany 1 700-den aspaýǵa tiis.
Sonymen birge biyl tirkeý tártibine birqatar ózgeris engizildi. Budan bylai Eýraziialyq ekonomikalyq odaqqa múshe memleketterden kelgen eńbek migranttary emhanaǵa tirkelý úshin erikti meditsinalyq saqtandyrý polisin satyp alýǵa tiis. Olar tirkelý úshin emhananyń tirkeý bólimine baryp ótinish jazady.
Tirkeý naýqanyna Qordyń málimetter bazasyna engen emdeý mekemeleri ǵana qatysady. Olardyń tolyq tizimimen www.fms.kz resmi saity arqyly tanysýǵa bolady.
