Almatylyq jup jańa týǵan sábiin satpaq bolǵan, - dep habarlaidy "Ult aqparat" Polisia.kz saityna silteme jasap.
Osy qylmysty jasady degen kúdikpen jeti adam qamaýǵa alynǵan. Olardyń árqaisynyń roli naqty bólingen.
"Týǵanyna alty kún bolǵan qyzyn 24 jastaǵy kelinshek pen onymen birge turatyn 21 jastaǵy er adam satpaq bolǵan. Jup balany satyp alýshylardy eki ai buryn izdei bastaǵany anyqtaldy. Balany Almaty qalasynyń turǵyndary - 48 jastaǵy Ý. esimdi er adam jáne 46 jastaǵy E. esimdi áiel alǵysy kelgen. Taraptar 2 million teńgege kelisken. Mámile ótken demalysta jasalǵan. Alaida Kriminaldyq politsiia jáne Uiymdasqan qylmyspen kúres basqarmalary qyzmetkerleriniń qalanyń ár jerinde bir ýaqytta júrgizgen arnaiy is-sharasy kúdiktilerdiń josparyn buzdy. Alǵashqylardyń qatarynda qyzdyń biologiialyq ata-anasy ustaldy. Odan keiin – áleýetti satyp alýshylar jáne erli-zaiypty deldaldar. Kelesi qadam aqshalai syiaqy úshin balanyń qujattaryn rásimdeý mindetin óz moinyna alǵan 56 jastaǵy A. esimdi áieldi ustaý boldy", - dedi Almaty qalalyq Politsiia departamenti bastyǵynyń orynbasary Didar Ahanov.
Politsiia náreste men mámileniń qalǵan somasyn bir-birine berý kezinde satyp alýshylar men deldaldardyń ustalǵanyn atap ótti.
"Óte mańyzdy jait: kezdesý kezinde deldaldardyń qolynda taǵy eki sábii bolǵan, boljam boiynsha úsh jáne bir ailyq balalar. Er adam bular ózderiniń balalary ekenin aita bastady. Alaida olar balalardyń jeke basyn kýálandyratyn qujatty kórsete almady. Osylaisha, osy arnaiy is-sharanyń nátijesinde kúdiktilerden úsh sábi alyndy. Olar meditsinalyq mekemege tekserilý jáne qajet bolǵan jaǵdaida kómek kórsetý úshin jetkizildi. Kúdiktiler bul balalardy "tiri" taýar retinde paidalanýy múmkin ekenin joqqa shyǵarmaimyz. Tergeý mindetti túrde shyndyqty anyqtaidy", - dedi Ahanov.
Almaty qalalyq PD Tergeý basqarmasy málimetinshe, derek boiynsha QR QK-niń 135-baby 2-bóliginde kózdelgen qylmysqa sáikes sotaldy tergeý bastalǵan. Kúdiktiler ýaqytsha ustaý izoliatoryna qamaldy.
