Almaty dárigerleri poiyzdyń tóbesinde selfi jasaǵan kezinde toqqa urynyp, aman qalǵan jasóspirimniń jaǵdaiyn aitty, dep habarlaidy QazAqparat.
«2007 jyly týǵan S. esimdi naýqas 27 jeltoqsan kúni meditsinalyq jedel járdem brigadasymen №4 qalalyq klinikalyq aýrýhananyń qabyldaý bólimine jetkizildi. Elektr jaraqaty diagnozymen tústi. Ol balalarǵa shuǵyl meditsinalyq kómek kórsetý ortalyǵyna aýystyryldy. Qazirgi ýaqytta balanyń jaǵdaiy óte aýyr. Anesteziologiia, reanimatsiia jáne intensivti terapiia bóliminde jatyr, jasyna sáikes intensivti terapiia alýda», - dep málimdedi Almaty qalasynyń qoǵamdyq densaýlyq basqarmasynda.
Eske salsaq, 27 jeltoqsanda Almaty stantsiiasyndaǵy qabyldaý-jóneltý parkinde selfi jasap júrgen eki jasóspirim joǵary kerneýli tok razriadyn aldy. Olardyń biri sol jerde qaitys boldy.
