© Rixabay/Skitterphoto
Almatylyq dáriger Iýrii Shýmkovty atyp óltirgen er adamnyń anasy halyqtan keshirim surap, ulynyń osy qylmysqa ne sebepti barǵanyn aitty, dep habarlaidy Sputnik Qazaqstan agenttigi KTK arnasyna silteme jasap.
Aqpan aiynda gastroenterolog Iýrii Shýmkovtyń qabyldaýyna jazylǵan Nurjannyń turpaty zińgittei bolǵan. Anasynyń aitýynsha, asqazanyn tekserý úshin narkozben zond ótkizgende keńirdektegi shemirshegi synyp qaldy. Sodan tamaq ishe almai, eki aidyń ishinde 30 kelige aryqtaǵan.
Qur súlderi qalǵan jigit dáriger qatesin moiyndamai, teris ainalǵannan keiin jaǵaustatarlyq qylmysqa barǵan.
"Keiin sol dárigerge kelin ekeýi qaita bardy. Ol tyńdamai salqyn shyǵaryp salypty. Ózge dárigerlerge de qaraldy. Biraq oǵan em kómektespedi", - deidi anasy.
Anasy ulynyń áreketin aqtap otyrǵan joq, qolymen istegendi moinymen kóterýge tiis ekenin aitady. Biraq anasy uly sotqa jetpei ólip kete me dep alańdaýly.
Sebebi tergeý izoliatorynda onyń háli kúrt nasharlap ketken. Qaǵaz júzinde "densaýlyǵy qalypty", biraq kezdesýge zembilmen ákeledi.
"Zembilmen ákelip jolyqtyrady. Ne tura almaidy, ne júre almaidy, ne tamaq ishe almaidy. Dáretin, qusyp tastaǵan tamaǵyn janyndaǵy adamdar tógip, qarap jatyr. Al dárigerler qaǵaz júzinde ǵana qarap jatyr. Negizinde eshqandai em qoldanyp jatqan joq. Dárigerdi óltirdiń degen sebepti jeleý etetin siiaqty", - dep atap kórsetti anasy.
35 jastaǵy kúdikti Nurjan úsh balanyń ákesi. Jeke kásipkerlikpen ainalysqan. Buǵan deiin isti bolmaǵan. Túrmege otyrsa da, "o dúniege attanyp ketpesin" dep shyryldaǵan ana jalǵyz ulynyń naqaqtan-naqaq qaraýsyz ólip ketpegenin qalaidy.
"Qurmetti Qazaqstan halqy, 19 million halyqtyń aldynda keshirim suraimyn. Balamnyń qylyǵyna. Qaitys bolǵan dárigerdiń otbasynan, týystarynan basymdy iip keshirim suraimyn, bizdi keshirsin!", - deidi ol.
Aita keteri, biyl sáýirdiń basynda belgili almatylyq gastroenterolog Iýrii Shýmkovty atyp ketti. Kúdikti ustaldy. Ol Shýmkovtyń patsienti bolyp shyqty.
