Keiingi birneshe aptada megapoliste qant baǵasy sharyqtap ketti. Al, keibir dúkender men bazarlarda qant múldem joq, dep habarlaidy QazAqparat tilshisi.
«Men azyq-túlikti kóterme saýda bazarynan alam. Sonyń ishinde qant ta bar. Demalys kúni bazardan qumshekerdi áreń taptym. Baǵasy sharyqtap ketken. Bir keli qant – 800 teńge. Amal joq 25 kelisin 20 myń teńgege satyp aldyq», - deidi Almaty qalasynyń turǵyny Zina Musaeva.
Almatynyń taǵy bir turǵyny Nurgúl Qanatova úi janyndaǵy dúkenderde qant múldem joq ekenin aitady.
«Úige jaqyn birneshe dúkenge bardym. Qant joq. Satýshylar qazir qalada qant tapshy ekenin, dúkenderine áli jetkizilmegenin aitty. Sondyqtan, shaqpaq qant satyp aldym. Onyń da baǵasy kóterilipti – 675 teńge», - deidi Nurgúl Qanatova.
Al, Almaty ákimdiginiń málimetinshe, qantqa degen suranysty óteý maqsatynda kásipkerlik jáne investitsiialar basqarmasy ónimdi jetkizý kólemin arttyrǵan.
«Buǵan deiin kúnine 250 tonnaǵa jýyq qant jetkiziletin. Iri saýda jelilerindegi kóterme baǵa – 420-445 teńge. Búginde Almaty kúnine 300-500 tonna qant alady. Merki, Kóksý, Taraz qant zaýyttarynyń ónimderi iri saýda jelilerine, bazarlarǵa jáne V, S klasty dúkenderge jóneltiledi. Logistikaǵa bailanysty qoimalarǵa aiyna 5 myń tonnaǵa jýyq qant jetkizilse, qala turǵyndarynyń qajettiligi 3 300 tonna bolyp otyr», - dep jaýap berdi Almaty qalalyq kásipkerlik jáne investitsiialar basqarmasy QazAqparat joldaǵan saýalǵa.
