Almaty oblysyndaǵy tosqaýyl-beketti ainalyp ótýge tyrysqan azamattar 5 táýlikke qamaýǵa alyndy, dep habarlaidy "Ult aqparat".
Almaty oblystyq politsiia departamenti baspasóz qyzmetiniń málimetinshe, jaqynda tórt azamat Almaty qalasymen shektes blok-beketti zańsyz ainalyp ótýge tyrysqan.
«Atap aitqanda, 1986 jyly týǵan Túrkistan qalasynyń turǵyny elimizdegi tótenshe jaǵdai tártibin buza otyryp, Almaty qalasynyń aýmaǵyna Aqsai ózeni arqyly jasyryn ótýge tyrysqan. Ekinshi jaǵdaida 1968 jyly týǵan Almaty oblysynyń turǵyny osy ádispen karantin jariialanǵan aýmaqqa ótýge árekettengen. Taǵy bireýi - Almaty oblysynyń turǵyny. Ol Ile aýdany Pokrovka eldimekeniniń mańyndaǵy №22 blok-beket janynda ustaldy. Tórtinshi quqyq buzýshy 2000 jylǵy Qyrǵyzstan eliniń azamatshasy bolyp shyqty. Shetel azamatshasynyń eshqandai qujaty joq bolyp shyqty. Qazirgi jaǵdaida atalǵan azamattardyń áreketi qoldanystaǵy zańnamaǵa sáikes qatań jazalanatyny belgili»,- dedi Qarasai aýdany politsiia basqarmasynyń bastyǵy politsiia polkovnigi Ashat Daniiar.
Ustalǵan azamattarǵa QR Ákimshiliq quqyq buzý týraly kodeksiniń 476-babyna sáikes hattama toltyryldy. Sondai-aq, mamandandyrylǵan aýdanaralyq sot sheshimimen olar 5 táýlikke qamaldy.
Al, Qyrǵyz Respýblikasynyń azamatshasy barlyq jaǵdai anyqtalǵanǵa deiin qabyldaý-taratý mekemesine ornalastyryldy.
