Qazaqstanǵa Aýǵanstannan kelgen barlyq adam COVID-19-ǵa synama tapsyrdy. Bul týraly Almaty qalasy Sanitarlyq-epidemiologiialyq baqylaý departamenti málim etti, - dep habarlaidy "Ult aqparat".
Ulttyq saraptama ortalyǵy málimetinshe, Kabýldan kelgen Qazaqstan azamattary men BUU qyzmetkerleri arasynan PTR-synamasy oń nátije kórsetkeni joq.
Aita keteiik, 19 tamyzda Kabýldan Almatyǵa 2 reis keldi. Alǵashqy reispen 27 Qazaqstan azamaty (onyń ishinde 6 bala) jáne 15 Qyrǵyzstan azamaty keldi, olar áýejaidan birden eline ketti. Shera Inn qonaqúiine Qazaqstannyń 27 azamaty ornalastyryldy.
Ekinshi reispen BUU diplomatiialyq missiiasynyń 135 múshesi keldi, olardyń arasynda Aýǵanstan azamattary joq. Olar Rixos qonaqúiine toqtady.
22 tamyzda Kabýldan Almatyǵa 108 adam keldi, olardyń barlyǵy - BUU diplomatiialyq missiiasynyń músheleri. Olar Intercontinental qonaqúiine ornalastyryldy.
