Foto: gov.kz
Almatydaǵy jer silkinisinen keiin 44 adam meditsinalyq kómekke júgingen, - dep habarlaidy "Ult aqparat" Densaýlyq saqtaý ministrligine silteme jasap.
"Túngi saǵat 01:00-den bastap Almatyda bas jaraqaty, soǵylý, aiaq-qoldyń sozylýy siiaqty jeńil jáne ortasha aýyrlyqtaǵy túrli jaraqaty bar 44 adam meditsinalyq kómekke júgindi.
Olar ártúrli kórsetilimdermen qalanyń statsionarlaryna jetkizildi, onyń ishinde 34 eresek adam, onyń 3-i aýrýhanaǵa jatqyzyldy, 31 adam ambýlatoriialyq emdelýge jiberildi.
Sondai-aq 10 bala meditsinalyq kómek aldy, onyń 5-i aýrýhanaǵa jatqyzyldy, 5-i ambýlatoriialyq emge jiberildi" - delingen habarlamada.
Vedomstvo málimetinshe, barlyq patsient qalanyń emdeý mekemelerinde bilikti meditsinalyq kómekpen qamtamasyz etilgen.
