Almatyda oqýshylar tóbelesip, ekeýi pyshaq jaraqatyn aldy. Olar aýrýhanada jatyr. Bireýiniń jaǵdaiy aýyr, dep habarlaidy QazAqparat.
Almaty qalalyq Qoǵamdyq densaýlyq saqtaý basqarmasynyń málimetinshe, oqýshylar pyshaq jaraqatymen №2 qalalyq balalar aýrýhanasyna 27 qazan kúni tústi.
«Keshe pyshaq jaraqatymen kámelet jasqa tolmaǵan eki jasóspirim №2 qalalyq balalar aýrýhanasyna tústi. Jaqyn týystarynyń aitýynsha, balalar qatarlastarymen bolǵan tóbeles kezinde jaraqat aldy. Birinshisiniń jaǵdaiy aýyr, turaqsyz, ishtiń aldyńǵy búiir qabyrǵasy men sol jaq búiregi zardap shekken, ekinshi naýqastyń ish qurylysyna zaqym kelgen, jaǵdaiy birqalypty, bólimshege aýystyryldy», - dep habarlady basqarmadan.
Buǵan deiin Almaty qalalyq Politsiia departamenti oqiǵaǵa qatysty túsinikteme berdi. «QR Qylmystyq kodeksiniń 106-baby boiynsha sotqa deiingi tergep-tekserýdiń biryńǵai tizilimine tirkeldi. Anyqtalǵandai, jasóspirimder arasynda janjal shyǵyp, saldarynan ekeýi pyshaq jaraqatyn aldy. Kúdikti anyqtalyp, qamaýǵa alyndy. Saraptama taǵaiyndaldy. Tergeý jalǵasýda», -dep habarlady Almaty qalalyq PD baspasóz qyzmeti. Oqiǵa Alataý aýdanyna qarasty «Aqkent» shaǵynaýdanynda boldy.
