Almatyda mamandandyrylǵan HQKO-da Armeniiadan ákelingen alǵashqy kólik tirkeldi, dep habarlaidy QazAqparat.
47 jastaǵy almatylyq Hosrov Gasanov Qazaqstanda alǵashqylardyń biri bolyp Armeniiadan jetkizilgen kóligin tirkep, nómir aldy.
«Men «Hiýndai Grand Stareks» avtokóligin Armeniiadan 2019 jyldyń qarasha aiynda alyp keldim. Sodan beri ony elimizde qalai zańdastyram dep ábden ýaiymdadym. Qalada emin– erkin aidap júre almadym. Memleketke rahmet, bizge múmkindik berdi. Búgin men mamandandyrylǵan halyqqa qyzmet kórsetý ortalyǵyna keldim, mamandar 15 minýttyń ishinde kóligimdi tirkep berdi. Memlekettik baj - 11 946 teńge tóledim. Endi men zańdy túrde esh kedergisiz júre alamyn. Memleketimizge taǵy da rahmet», - dedi Hosrov Gasanov.
Eske salaiyq, Memleket basshysynyń tapsyrmasyna sáikes, Úkimettiń arnaiy qaýlysy shyqty. Qazaqstandyqtarǵa Armeniiadan ákelgen kólikterin 2020 jyldyń 1 aqpanyna deiin tirkeýge múmkindik berdi.
«Birinshiden, Úkimet 2020 jyldyń 1 aqpanyna deiin Armeniiadan ákelgen avtokólikterdi tirkeý týraly sheshim qabyldady. Ekinshiden, osy jyldyń 1 maýsymy men 1 qyrkúiegi aralyǵynda tirkeý júrgizýge ruqsat berildi. Úshinshiden, tek sol jaqtaǵy basqarý elementteri bar avtokólikter tirkeýge jatady. Tórtinshiden, úsh tólemmen shekteý týraly sheshim qabyldandy: tirkeý jarnasy - 695 teńge, tirkeý kýáligi úshin tólem - 3 473 teńge jáne MTNB úshin alym - 7 778 teńge. Tólemderdiń jalpy somasy 11 946 teńgeni quraidy. QR 2020 jyldyń 1 aqpanynan keiin ákelingen kólik quraldaryn tirkeýge ruqsat etilmeidi. Sonymen qatar, Armeniia Respýblikasynyń ýákiletti organy bergen tirkeý qujattarynda menshik iesi retinde kórsetilmegen adamdarǵa tirkeý júrgizilmeidi», - dedi, Almaty qalalyq PD Ákimshilik politsiia basqarmasynyń bastyǵy Jandos Muratáliev.
