Almatyda Olimpiada oiyndarynyń qola júldegeri, qazaqstandyq mánerlep syrǵanaýshy Denis Tenniń esimi kóshelerdiń birine resmi túrde berildi, dep habarlaidy ult.kz. Tengri Life-qa silteme jasap.
Jańa kóshe Bostandyq aýdanyndaǵy Arhat shaǵynaýdanynda, Tuńǵysh Prezident saiabaǵynyń ońtústiginde ornalasqan. Burynǵy 7-kóshege Denis Tenniń esimi berildi.
Bul sheshim Almatydaǵy buryn ataýy bolmaǵan kóshelerge resmi ataý berý jumystary aiasynda qabyldandy. Jalpy qaladaǵy Alataý, Áýezov, Bostandyq, Jetisý, Medeý, Naýryzbai jáne Túrksib aýdandaryndaǵy 150-den astam kóshege jańa ataý berilgen.
Resmi qujatqa sáikes, Arhat shaǵynaýdanyndaǵy ózge kósheler de belgili tulǵalardyń qurmetine ataldy. Atap aitqanda, 2-kóshege – Ámen Qaidarovtyń, 3-kóshege – Baidulla Sabdykeevtiń, 4-kóshege – Sarqannyń, 5-kóshege – Ǵabbas Jumatovtyń esimi berildi. Al tuiyq kóshelerdiń biri Sileti, ekinshisi Hromtaý ataýyn ielendi.
Sonymen qatar Almatynyń basqa aýdandaryndaǵy ataýsyz kóshelerge de qoǵam qairatkerleriniń, mádeniet pen ǵylym ókilderiniń, sondai-aq qalalar men tarihi-geografiialyq nysandardyń ataýy berildi. Olardyń qatarynda Amantai Baitanaev, Ho Shi Min, Natalia Sats, Qaiym Muhamedhanov, Ábdijámil Nurpeiisov, Muzafar Álimbaev, Smaiyl Ótegenov, Maýythan Sydyqov, Bekesh Mádáliev jáne Anatolii Hrapatyi siiaqty tulǵalardyń esimderi bar.
Eske salaiyq, Denis Tenniń esimin Almaty kósheleriniń birine berý týraly sheshim byltyr kúzde belgili bolǵan edi. Ol kórnekti tulǵalardyń esimin máńgi este qaldyrýǵa baǵyttalǵan qalalyq baǵdarlama aiasynda qabyldanǵan.
Denis Ten – Qazaqstan tarihyndaǵy eń tabysty mánerlep syrǵanaýshylardyń biri. Ol 2014 jyly Sochide ótken Qysqy Olimpiada oiyndarynyń qola júldesin jeńip alyp, elimizdiń mánerlep syrǵanaý tarihynda erekshe iz qaldyrdy. Sportshy 2018 jyldyń 19 shildesinde Almatyda avtokóliginiń ainasyn urlamaq bolǵan kúdiktilerdi toqtatpaq bolǵan sátte alǵan jaraqatynan kóz jumǵan.
