Foto: Tengrinews.kz
Almatydaǵy hostelde kóz jumǵandardyń denesi búgin jer qoinyna tapsyryldy. Órt kezinde tunshyǵyp mert bolǵan azamattardyń ishinde Túrkistan oblysynyń alty turǵyny bar. Marqumdardyń bireýi kámeletke de tolmaǵan 15 jastaǵy bozbala. Taǵy bireýi - stýdent, qalǵany - jumys isteýge barǵandar, - dep habarlaidy KTK arnasy.
Qazyǵurttyń Syntas aýylynda búgin azaly kún. Úsh ai buryn Almatyǵa jumys isteýge shyqqan 20 jastaǵy Beibarys Áldibek úiine tabytpen oraldy. Úsh aǵasy úilenip enshisin alyp shyqqan soń, sóilei almaityn múgedek áke-sheshesin baǵý úshin Beibarys Almatydaǵy fast-fýd ortalyǵynda aspaz bolyp jumys istegen. Ózi únemi aqsha jiberip turatyn jigit ata-anasymen sońǵy márte videobailanys arqyly sóileskende jalaqysy keshiktirilip jatqanyn aityp aqsha surapty.
"Aldyńgúni videobailanyspen sóilestik. "Mama, aqsha berińizshi, 3 myń teńge" degen. "Qashan aýylǵa kelesiń, tez qait" desem, "1-2 kúnde kelem" dep aitty. Aqshasyn ýaqytyly bermegennen keiin sol jaqta qaldy. Ailyǵyn kútken shyǵar. Maǵan úkimettiń 1 milliony qajet emes, maǵan balamnyń ózi kerek. Nege sony qadaǵalamaidy, tereze nemese órt dabylyn nege qoimaǵan", - deidi marqumnyń anasy Baian Sadyrbaeva.
Tańnan qara keshke deiin jumys istegen bala qýyqtai ǵana bólmede 10 adammen birge turypty. Beibaryspen 1,5 aidan beri hostel jaǵalap, birge jumys istegen dosy órt bolardan úsh saǵat buryn ǵana ailyǵyn almastan aýylǵa qaitypty. Júzin kórsetkisi kelmegen joldasy ózin shyǵaryp salǵan dosynyń endi joq ekenine sene almaidy.
"Bir bólmede 10 adamnan jatatyn edik, 4-5 adam tólep qoiǵan. Qalǵany kúnige aýysyp ketetin. Biz tek uiyqtaýǵa keletinbiz. Bizben qatarlas bolatyn bári. 2003, 2002, 2001 jylǵy bolatyn. Eki stýdent. Bireýi bizben jumysqa baryp keletin. 16, 15, 13 degen bólme bolatyn, ekeýi túpki jaǵynda bolǵan. Aldynda kóptegen matras jatatyn. Sol matras tútindegen, sonyń iisine tunshyǵyp qalǵan, esikten shyǵa almaǵan", - deidi marqumnyń dosy.
Marqumnyń jaqyndarynyń aitýynsha, 20 jastaǵy bala jertólede turyp kelgenin aitpaǵan. Tirisinde tuiyq bolǵan ol Almatyda tapqan tabysyna eskirgen úiin jóndep, sońynan úilengisi kelgen eken. Biraq jaǵdaiy jasalmaǵan hostelde ólgenin bilgen soń, endi týystary "jertóleden qonaq úi jasaǵandar men olardy qadaǵalamaǵan jaýaptylar jazalansyn" dep talap etip otyr.
Kesheli beri "osynda júrmiz" degen sheneýnikter endi aýylǵa tórt jyl buryn kelgen gazdy osy ai ishinde kirgizip beremiz dep ýáde etken. Marqumnyń 40 kúndik asyn da aýdan ákimdigi óz moinyna alypty. Qaiǵydan qan jutqandar esin jiǵan soń múgedekter turatyn úidiń barlyq máselesin sheshemiz deidi.
"Gaz qazir shańyraǵyna kelip tur. Tek qosý ǵana qaldy. Bir eki apta kóleminde qosyp beremiz. Iá, qazandyqtaryn alyp beremiz. Gazdy qosyp beremiz. Januiaǵa qandai járdem kerek bolady, sonyń bárin mekeme tarapynan járdem beremiz", - dedi Qazyǵurt aýdany ákiminiń orynbasary Serik Tursynqulov.
Jertóledegi hostelde ýly tútinge tunshyǵyp kóz jumǵan Túrkistan oblysynyń alty azamatyn aǵaiyn-týystary aqtyq saparǵa shyǵaryp saldy. Arasynda kámeletke tolmaǵan jasóspirim de bar. Keles aýdanynyń 15 jastaǵy turǵyny Almatydaǵy kolledjderdiń birinde oqyǵan. Qalǵany jumys istegen eken. Endi olardyń artynda eńiregen eki jesir men eki ul jetim qaldy.
