Almatyda dúkendi tonaǵan maroder Túrkistanda ustaldy. Bul týraly búgin brifingide Túrkistan oblysy Politsiia departamenti bastyǵynyń tergeý jónindegi orynbasary Asyljan Qaldarbekov aitty, dep habarlaidy QazAqparat.
Jedel-izdestirý is-sharalaryn júrgizý barysynda Túrkistan qalalyq Politsiia basqarmasynyń kriminaldyq politsiia qyzmetkerleri Kentaý qalasynyń birindegi qonaq úige aialdaǵan Óskemenniń 2 turǵynyn anyqtaǵan.
Kúdikke ilingen olardyń bireýi urlanǵan zattardy Túrkistan qalasyndaǵy lombardqa ótkizip turǵan jerinen ustaldy.
«Ustalǵan kúdikti buryn qaraqshylyq qylmysy úshin sottalǵanyn anyqtadyq. Onyń aitýynsha, dosymen birge 5 qańtarda Almatyǵa barǵan. Iaǵni, jappai tártipsizdik kezinde Kcell, Activ dúkenderiniń birin tonap, ol jerden 5 dana Samsung telefonyn, 2 dana symsyz qulaqqapty jáne Apple watch brendtik smart-saǵatty alyp ketken. Jalpy keltirilgen shyǵyn kólemi million teńge jýyq», - dedi politsiia polkovnigi.
Kúdiktiler izderin jasyrý maqsatynda qaitadan Óskemenge úilerine qaitqan. Sol jaqta 3 dana telefondy lombardqa ótkizip, aqshasyn óz qajettilikterine jumsap jibergen. Aldyn ala josparly túrde áreket etken ekeý blokbeketterdiń barlyq jerde alynyp tastalǵanyn paidalanyp, Túrkistan oblysyna taksimen kelgen.
«Búgingi tańda atalǵan jaitqa bailanysty tergeýshiler QR QK 188-baby «Urlyq« boiynsha sotqa deiingi tergeý jumystaryn júrgizýde. Kúdikti qamaýǵa alyndy. Al aiǵaqty zat retinde urlanǵan zattardyń bir bóligi tárkilendi. Sotqa deiingi tergeý kezinde qylmystyń barlyq jai-japsaryn anyqtaityn bolamyz», - dedi A.Qaldarbekov.
Qazirgi tańda politsiia qyzmetkerleri kúdiktiniń sybailasy, iaǵni ekinshi jas jigitti izdestirýde.
