Almatyda bes adamdy atyp óltirgen Igor Dýjnovtyń otbasynyń múlkin paidalanýǵa kedergi jasamaýdy ótingen bank talaptaryn sot qanaǵattandyrýdan bas tartty, dep habarlaidy Sputnik Qazaqstan.
Bostandyq aýdany sotynyń baspasóz qyzmetiniń habarlaýynsha, buǵan deiin bank Dýjnovtyń áieli Anaida Demirchiannyń kepil múlkin satyp alý boiynsha saýda-sattyqta jeńiske jetken. Oǵan jer ýchaskesi bar úi-jai tiesili bolǵan. Osy jyldyń 30 sáýirinde bank atalǵan nysanǵa menshik quqyǵyn ózine tirkedi.
"Demirchianǵa talaptar qoiyldy, biraq is júzinde ol - daýly múliktiń iesi emes. Sonymen qatar Demirchiannyń bankke menshik iesi retinde atalǵan nysandy paidalanýǵa kedergi keltirip otyrǵany týraly sotqa eshqandai dálel keltirilmegen", - dep málimdedi aýdandyq sottyń baspasóz qyzmeti.
Sondai-aq sot bul múlikti tórt jeke tulǵa jalǵa alyp otyrǵanyn anyqtady. Burynǵy menshik iesi Demirchian bul múlikti úshinshi tulǵalarǵa jalǵa bergen. Qazir solar bul nysandy jalǵa alyp otyr.
"Bank jaldaý sharttaryna qatysty qarsylyq tanytpaǵan, alaida ol kelisimge menshiktiń burynǵy iesi bank menshik quqyǵyn tirkegenge deiin qol qoiǵan. Iaǵni zańdy túrde 12 aiǵa deiin jasasqan", - dedi sottyń baspasóz qyzmeti.
Aitylǵan jaittyń barlyǵy eskerilip, sot sheshim qabyldaǵan kezde talapker óz quqyqtaryn qorǵaýdyń qate ádisin tańdady degen qorytyndyǵa keldi. Sot talapty qanaǵattandyrýdan bas tartty. Sot sheshimi zańdy kúshine engen joq. Oǵan taraptar shaǵymdana alady.
Almatydaǵy atys
20 qyrkúiek kúni keshke qarai áleýmettik jelide belgisiz bireýdiń bes adamdy atyp tastaǵany týraly aqparat tarady.
Aqbulaq shaǵyn aýdanynda úi iesi sot oryndaýshylary men ýchaskelik inspektorlarǵa oq atty. 5 adam qaitys boldy: 2 politsei, 1 sot oryndaýshy jáne 2 jeke tulǵa.
Tragediia shamamen saǵat 17:00-de bolǵan. Sot oryndaýshysy men politseiler sot úkimin oryndaýǵa kelgen. Sol kezde baspanany bosatýǵa mindetti er adam úige kirip ketip, zańdy túrde tirkelgen qarýdan sot oryndaýshysy men aýlada turǵan adamdarǵa oq atqan.
Keiin kúdikti ustaldy.
Sot úidi ne úshin tárkiledi?
Sot materialdaryna sáikes, Aqbulaqtaǵy jeke menshik úidiń máselesi 2014 jyly bastalǵan. Odan úsh jyl buryn baspananyń iesi A.Demirchian Baǵanashyl shaǵyn aýdanynda bos turǵan úi-jailaryn jáne Aqbulaqtaǵy kottedjin kepilge salyp, BankTsentrKreditten qyrýar kredit alǵan. Biraq qaryzdy tólei almaǵan.
Sodan bank ókilderi ony sotqa berip, kepilde turǵan úidi tárkileýdi talap etti. Kredit alǵandardyń ishinde I.Dýjnov ta bar.
2018 jyldyń basynda Alataý aýdandyq soty banktiń aryzyn qanaǵattandyrý týraly syrttai sheshim shyǵardy. Al Aqbulaqtaǵy úidiń bastapqy baǵasy 29,4 million teńge dep bekitildi. Al tamyz aiynda sot sheshimin oryndaý aiasynda aýktsion uiymdastyryldy. Sonyń negizinde jeke sot oryndaýshy R.Táńirbergenov úidi N.Turǵanovqa satyp jiberdi. Úidi satyp alý kelisimsharty jasalyp, memlekettik organda tirkeldi.
Alaida jeltoqsan aiynda sottyń syrttai sheshimi toqtatyldy. 2019 jyly naýryz aiynda Alataý aýdandyq soty BankTsentrKredittiń aryzyn keri qaitardy. Biraq 27 qarashada Almaty qalalyq sotynyń azamattyq ister jónindegi sot alqasy aýdandyq instantsiianyń sheshimin joiyp, banktiń aryzyn qanaǵattandyrdy.
Osydan keiin A.Demirchian aýdandyq sotqa taǵy aryzdanyp, úidi satý týraly kelisimsharttyń kúshin joiýdy talap etken. Sebebi 2018 jyly banktiń aryzy keri qaitarylǵannan keiin kottedjdi satýǵa zańdy negiz bolmaǵan. Oǵan qosa, aryz berýshi qalalyq sottyń bank talabyn qanaǵattandyrǵanyn bilmei qalǵan. Sodan 2020 jyly Turǵanov qaitadan úidiń jańa iesi bolyp shyqty.
Demirchian memlekettik organda tirkelgen kelisimshartty joiýdy surady. Biraq Alataý aýdandyq sotynyń 2021 jyly 11 aqpanda shyǵarǵan sheshimine sáikes, onyń talaptary qanaǵattandyrylǵan joq.
Al jeti aidan keiin sot sheshimin oryndaý úshin úige bes adam barǵan. A.Demirchiannyń kúieýi olardy atyp tastady.
