Koronavirýs infektsiiasymen túsken sońǵy naýqas Almaty qalasyndaǵy áskeri gospitalden emdelip shyqty. Ol - 59 jastaǵy Galina Jýkova, dep habarlaidy "Ult aqparat" orǵanys ministrliginiń baspasóz qyzmetine silteme jasap.
«Qorǵanys ministrligi áskeri klinikalyq gospitaliniń búkil ujymyna júrgizgen em úshin rizamyn. Dárigerler men meditsinalyq personal - joǵary bilikti mamandar, olardyń daiyndyǵy kórinip turdy. Áskeri dárigerlerdiń naýqastarǵa degen qamqorlyǵy, jaqsy kútimi men izgi qarym-qatynasy da baiqaldy. Dári-dármek tolyq kólemde jáne úzilissiz berildi. Tamaqtaný da túrli ári qunarly boldy», - deidi emdelýshi.
Jalpy áskeri gospitalde 800-ge jýyq adam, onyń ishinde áskeri qyzmetshiler emdelip shyqty. Shamamen 40% naýqas syrqattyń aýyr aǵymymen qabyldanǵan, sonymen qatar naýqastardyń jartysynan kóbi koronavirýs infektsiiasynan bólek qan ainalymy júiesi, tynys alý organdary, endokrindik patologiia sekildi syrqattary bar egde jastaǵy adamdar boldy. Áskeri dárigerlerdiń aldynda mindetterdiń biri retinde indettiń asqynýyn aldyn alý jáne emdeý júrgizý edi.
«Bizdiń gospital epidemiiaǵa qarsy qatań rejimde jumys isteý boiynsha úlken tájiribe jinady. Meditsinalyq personal atalǵan patologiiasy bar naýqastarmen jumys jasaýǵa daiyn, dárigerler men medbikeler óz mindetterin jaqsy biledi, talap etiletin qaýipsizdik sharalaryn saqtap, sonymen qatar túrli kútpegen jaǵdailarda áreket etýge ázir. Biz táýlik boiy jumys atqardyq. Barlyq dárigerler men medbikeler asa joǵary kásibilikterin kórsetip, tanytqan qaisarlyqtarynyń arqasynda biz indetti jeńe bildik. Búgin biz sońǵy naýqasty emdep shyǵardyq, bul barlyq meditsinalyq personal úshin úlken qýanysh», – dedi Almaty qalasy áskeri klinikalyq gospitaliniń bastyǵy Samat Sársenbaev.
Áskeri-meditsinalyq mekeme bastyǵynyń aitýynsha, gospitaldiń materialdyq-tehnikalyq bazasy naýqastardyń ornalasýy men tamaqtaný máselelerimen qosa alǵanda emdik-diagnostikalyq protsesti tolyq kólemde júrgizýge múmkindik beredi.
Eske sala keteiik, 3 tamyzdan bastap Reseiden kelgen áskeri dárigerlermen birlesken jumys bastaldy. COVID-19 indetinen emdeý men tájiribe almasý boiynsha birshama máseleler pysyqtaldy.
Aita ketý kerek, kóptegen áskeri meditsinalyq mekemeler koronavirýs indeti anyqtalǵan naýqastardy emdeýge jáne oqshaýlaýǵa qatysatyn emdik-profilaktikalyq mekemeler tizimine engizilgen bolatyn.
Meditsinalyq mekemeler karantindik, provizorlyq jáne infektsiialyq statsionarlardyń talaptaryna sáikes qaita qurylǵan edi.
