Almaty qalasy Naýryzbai aýdanynyń ákimi Sanjar Toǵai Abai kóshesin sozý jumysy qashan aiaqtalatynyn aitty, dep habarlaidy QazAqparat.
Bul jumys 2017 jyly bastalǵan bolatyn.
«Naýryzbai aýdanynda Abai kóshesiniń boiynda 264 nysan ornalasqan. Olardyń birazy ýchaskesin satýǵa sot arqyly kelisti. Qalǵany sotta qaralyp jatyr. Baǵalaý júrgizilip jatyr. Abai kóshesi Áshimov kóshesine deiin sozyldy. Batystan Karernaia kóshesinen Nurly kóshesine deiin de jóndeý jumystary aiaqtaldy. Endi osy eki ýchaskeni qosý ǵana qaldy», - dedi ol.
Ákimniń aitýynsha Jer qatynastary basqarmasy jerdi memleket múddesine satyp alýmen ainalysyp jatyr.
Biyl osy maqsatta 3,7 mlrd teńge bólindi.
«Bul belgilengen ótemaqyǵa kelisken ýchaskeler boiynsha kórsetilgen soma. Kelispegen adamdarmen jumys kelesi jyly sotta qaralady. Anyq ýaqytyn aitý múmkin emes. Shamamen eki jylda júzege asyp qalar dep oilaimyn», - dedi Sanjar Toǵai.
Sonymen qatar, aýdan basshysy Tóle bi kóshesiniń bolashaqtaǵy kelbeti týraly baiandady.
«Almaty qalalyq bas josparyna sáikes Tóle bi kóshesi Nurly kóshesine deiin sozylýy tiis. Bul kóshe aýdan ákimdiginen bastalyp, Raiymbek kóshesine deiin sozylatyn bolady. Búgingi tańda Nurly kóshesin Raiymbekke deiin sozý, Tóle bi kóshesin Nurly kóshesine deiin sozý máselesin qarastyryp jatyrmyz. Bul sharalar qalaǵa kiretin kólikter aǵynyn azaitýǵa septigin tigizbek. Joba biyl aiaqtalady. Kelesi jyly qurylys jumystary bastalady», - dedi ol.
