Almatyda jyl basynan beri turmysta gaz jabdyǵyn paidalaný kezinde 28 jazataiym oqiǵa boldy. Bul týraly Almaty óńirlik kommýnikatsiialar qyzmeti alańynda Almaty qalasy TJD Memlekettik órt baqylaý basqarmasynyń basshysy Aleksandr Raý málimdedi, dep habarlaidy QazAqparat.
28 jazataiym oqiǵanyń 17-si tabiǵi gazben ýlaný (36 adam zardap shekti, onyń ishinde 22 bala, 3 adam qaza tapty), 11-i gaz-aýa qospasynyń jarylýy (6 adam túrli aýyrlyqtaǵy kúiik aldy) boldy.
«Júrgizilgen taldaýǵa sáikes, órttiń, jarylystyń jáne adamdardyń ýly gazben ýlanýynyń 60%-y adamdardyń jylytý aspaptaryn, gaz jabdyǵyn paidalaný kezinde ózderiniń nemquraily qarym-qatynasynan týyndaitynyn kórsetti. Turǵyndar murjalardaǵy bitelýdi baqylamaidy, murjany durys qospaidy, sondyqtan onyń tutastyǵy buzylady. Turǵyndar gaz plitalaryn qaraýsyz qaldyrǵan jaǵdailar boldy. Jazataiym oqiǵalardyń taǵy 40%-y gazdyń shyǵýy, rezeńke tútiktiń tozýy, gaz ballondarynyń durys saqtalmaýy saldarynan oryn alady», - dep atap ótti Raý.
Sondai-aq, TJ departamentiniń ókili adamdardyń gazdy abaisyz qoldanýy qaiǵyly jaǵdiǵa ákeletini týraly mysaldar keltirdi.
«Máselen, gazdyń aǵyp ketý oqiǵasy biyl 29 qańtarda Ibragimov kóshesindegi kóp qabatty úilerdiń birinde boldy. Oqiǵaǵa as úidegi gaz ballonynyń redýktoryndaǵy shlangtyń tutastyǵyn buzý sebep boldy. Osy sebepti tutaný paida boldy, nátijesinde bir adam deneniń 80% termiialyq kúiik aldy.
Taǵy bir qaiǵyly oqiǵa 26 sáýirde Fizýli kóshesindegi jeke úide oryn aldy. Tabiǵi gazben jylytý peshiniń aqaýy saldarynan adam qaitys boldy. Sebep – jalynnyń sónýi jáne bólmege gazdyń keiinnen aǵý, peshtiń avtomatikasy gaz berýdi óshirmeýi, signalizatsiia klapanynyń jumys istemeýi.
Taǵy eki almatylyq 1 jeltoqsanda Aqan seri kóshesindegi úsh qabatty kóppáterli turǵyn úide qaza tapty. Onda tútin murjasynyń durys jalǵanbaýynan janý ónimderiniń paida bolýy oryn aldy. Páterde jylytý qurylǵysy kásibi emes túrde salyndy, murjanyń ornyna eki metrlik gofrlengen qubyr ornatyldy, gaz berýdi avtomatty túrde toqtatatyn qurylǵy bolmady», - dedi Aleksandr Raý.
Aleksandr Raý osy jazataiym oqiǵalardyń sebebi gaz aspaptarynyń tútin murjalary men jeldetkish arnalaryna sapasyz jáne formaldy tehnikalyq qyzmet kórsetý bolǵanynan ekenin aitty.
TJD Memlekettik órt baqylaý basqarmasynyń bastyǵy gaz ballondary men gaz jabdyqtaryn osy ónimdi ótkizýge sertifikattary bar mamandandyrylǵan uiymdardan ǵana satyp alýǵa shaqyrdy.
«Eshqashan gaz qurylǵylaryn, onyń ishinde gaz ballondaryn bóten adamdardan satyp almańyz. Mamandardyń qyzmetine júginip, gaz jabdyqtaryn jyl saiyn tekserip otyrý qajet. Jeldetý arnalaryn qadaǵalańyz, bólmeni únemi jeldetińiz, ásirese, jatar aldynda.
Gaz jabdyǵymen óz betinshe is-áreket jasaýǵa, tiisti ruqsatsyz gazdandyrýdy júrgizýge, gaz aspaptaryn jóndeýge jáne ornyn aýystyrýǵa kezdeisoq adamdardy tartýǵa tyiym salynady. Gazben bailanysty jumystardyń barlyq túrlerin mamandandyrylǵan uiymdar ǵana oryndaýy tiis», - dep eskertti Raý.
Aita keteiik, TJD málimetinshe Almatyda búginde qatty otynmen jylytylatyn 1 646 úi, 13 kóppáterli turǵyn úi bar. Sondai-aq, turmysta gaz ballondary qoldanylatyn 312 kóppáterli turǵyn úi bar. Bul negizinen qazirgi ýaqytta turǵyndar jekeshelendirgen burynǵy jataqhanalar bolyp tabylady.
