Jeti balanyń anasy, 26 jastaǵy kelinshek Almaty ákimi Erbolat Dosaevtan kómek surady, - dep habarlaidy Tengrinews.kz agenttigi.
Jetisý aýdanynyń turǵyndarymen kezdesýde kópbalaly ana buǵan deiin baspana kezeginde turǵanyn aitty. Alaida 2018 jyly ol tirkelgen Almaly aýdanyndaǵy úii satylyp, áiel ol jerdegi tirkeýden shyǵarylǵan. Odan keiin Túrksib óńirinde tirkeýde turǵan, biyl ol jerden de shyǵarylǵan.
"Meniń kúieýim áskeri adam, olardyń basqa, óz júiesi bar. Qazir bizdi eshkim tirkeýge qoimaidy. Jeti balammen esh jerde tirkelmegenbiz, meni baspana kezeginen de alyp tastady. Meniń túsinýimshe, 2018 jyly shyǵarylǵam.
Onyń ústine tórtinshi qyzym múgedek, biraq onyń da mártebesin rastai almai otyrmyz. Óitkeni 300 myń teńgeden bastalyp, úsh millionǵa deiin jetetin genetikalyq saraptama júrgizý kerek. Meniń kóligim bar edi, osy synaqtardyń bárin óz qarajatyma tapsyrý úshin ony satyp jiberdim. Biraq qyzym áli múgedektikke jatpady, aqyly túrde ótýin suraidy. Kúieýimniń ailyǵy 160 myń teńge, járdemaqym 80 myń. Qazir jalǵa alý qansha ekenin bilesiz be? Men memleketten eshteńe suramaimyn, tym bolmasa baspana kezek boiynsha bólsinshi", – deidi almatylyq.
Erbolat Dosaev oǵan kópbalaly ananyń baspana kezeginen joǵalyp ketýine qatysty máseleni jeke tekserýdi tapsyramyn dep jaýap berdi. Qala ákimi mán-jaidy anyqtaǵannan keiin jaǵdaidyń sheshimin tabýǵa kómektesýge ýáde berdi.
"Derekqorlardy tekserip kóreiik, nege bulai boldy jáne kezekke qaitarý úshin ne istei alamyz. Ókinishke qarai, búgin turaqty tirkeý ornyńyzdyń joqtyǵyn ózińiz rastadyńyz. Óitkeni is júzinde bul turǵyn úi baǵdarlamasy qala turǵyndaryna arnalǵan. Al onyń sharttary respýblika deńgeiinde bekitilgen. Bul kriteriiler joiylǵan joq. Men sizdi ruqsatsyz kezekke qoiamyn dep aita almaimyn. Biraq, ne isteýge bolatynyn kóreiik, ásirese áskeri qyzmetkerdiń áieli bolsańyz", - dedi ákim.
