- Almatynyń Túrkisib aýdanynda alaiaqtyq jasady degen kúdikpen 39 jastaǵy er adam ustaldy, dep habarlaidy "Ult aqparat".
Qalalyq IID baspasóz qyzmetiniń habarlaýynsha, kúdikti Túrkisib aýdany Qairat aýylyndaǵy ózine tiesili emes jerlerdi satý maqsatynda zańsyz kelisimder jasasqan.
«Kúdiktiniń sózine qaraǵanda, ol ákesine tiesili bolǵan 12 jáne 8 sotyq jer teliminiń qujattaryn taýyp alyp satpaq bolǵan. Biraq, satyp alýshylarǵa basqa jerlerdiń qujattaryn kórsetken. Fakt boiynsha, qazirgi ýaqytta ol jer telimideri ózge adamdarǵa berilgen. Ony kúdiktiniń bilmeýi múmkin emes. Kelisim jasasa otyryp ol, satyp alýshynyń aqshasyn alyp, qujattardy resimdeýdi ýaqytynyń joqtyǵyna siltei otyryp sozyp kelgen. Ókinishtisi, satyp alýshylar, qujattardyń durystyǵyna kóz jetkizbesten qomaqty qarajattaryn bergen», - dedi Túrkisib aýdany IIB basshysy, podpolkovnik Jasulan Turysbaev.
Qazirgi ýaqytta kúdikti qamaýǵa alyndy. Qazir ol kinásin moiyndap, keltirgen shyǵyndy qaitaryp beretinin aityp otyr.
Oqiǵa boiynsha QR QK 190-babyna sáikes qylmystyq is qozǵaldy. Qazirgi ýaqytta politsiia naqty shyǵyn somasyn anyqtaý ústinde. Sonymen qatar, kúdiktiniń ózge de qylmystarǵa qatystylyǵy tekserilip jatyr.
Politsiia osy iske bailanysty 298-54-00, 298-54-01 nómirlerine habarlasýdy suraidy.
