Almatyda osy jazda kópqabatty úilerdiń terezelerinen bes bala qulap ketken. Bul týraly Almaty qalalyq TJD málim etti, dep habarlaidy "Ult aqparat".
Almaty qalalyq Tótenshe jaǵdailar departamentiniń dereginshe, oqys oqiǵa saldarynan balalar túrli jaraqattar alyp, keibiri kóz jumǵan.
«Bul kóbinese eresekter kúndiz-túni terezeler men balkondardy ashyq tastap ketken kezde oryn alady. Joǵary qabattan ásirese 5 jasqa deiingi balalar qulap ketedi. Kishkentailarǵa qazir bári qyzyq, olar qaýip degendi bilmeidi», - dedi TJD.
2 tamyzda Medeý aýdanynda 4 jasar bala bes qabatty úidiń 5-shi qabatynan qulady. Búldirshin jedel-járdem kelgenshe kóz jumdy. Dál sol kúni Áýezov aýdanynda eki jasar qyz terezege qoiylǵan torymen birge tómenge qarai qulaǵan. Basynan jaraqat alǵan ol aýrýhanaǵa jetkizildi, qazir es-tússiz jatyr.
Osyǵan bailanysty, Almaty qalalyq Tótenshe jaǵdailar departamenti ata-analarǵa qajetti erejelerdi aitady.
«Balalar tereze 12,5 sm ashyq tursa tómenge qulap ketýi múmkin. Sondyqtan, terezege arnaiy qulyptar ornatqan jón. Balalarǵa terezelerden alys jerde oinaýdy túsindirip, úiretý kerek. Olardy únemi qadaǵalap otyrý qajet. Jándikterden saqtaityn torlarǵa senýge bolmaidy», - dep tolyqtyrdy departamenttegiler.
Sondai-aq, mamandar qarapaiym jáne senimdi qurylǵy týraly aitty.
«Arnaiy kabeldi jip terezelerdi keńinen ashýǵa múmkindik bermeidi. Bul qurylǵyny plastikalyq jáne aǵash terezelerge ornatýǵa bolady. Jeldetý kezinde de óte qolaily. Bul tásil balalardyń qaýipsizdigin qamtamasyz etedi», - dep atap ótti tótenshe jaǵdailar departamentinde.
