Arena S (Sulpak) JShS Bas direktory Dmitrii Provkin Almaty qalasynyń Almaly aýdandyq sotynda sóz sóilep, joba boiynsha aǵashtardy kesý josparlanbaǵanyn aitty, - dep habarlaidy Tengrinews.kz.
Provkin saýda úiin qaita qurý aiasynda aýmaqty abattandyrý jumystary josparlanǵanyn aitty.
"Abattandyrý jumystary boiynsha "Sakýra" JK merdigerimen shart jasasqan. Aǵashtardy kesýge ruqsat suraǵan joqpyz. Óitkeni mundai jumystar josparlanbaǵan. Merdigerge aǵashty kesýge tapsyrma berilgen joq", - dedi ol.
Almaly aýdanynyń bas ekologiialyq inspektory Azamat Óteshov sol túni Sulpak ǵimaraty mańynda sottalýshyny kórgenin aitty.
"Túnde ótip bara jatyp, aǵashtardy kesip jatqanyn kórdim. Ýaqyt tańǵy 3-4 bolatyn. Sottalýshyny sol jerde kórdim. Aǵashtardy kesýge ruqsaty bolǵan joq. Patrýldik politsiia keldi. Olardy turǵyndar shaqyrdy. Sottalýshyǵa tynyshtyqty buzǵany úshin aiyppul saldy", - dedi ol.
Sondai-aq, sot zalynda "EKO-ALMATY" JShS orman patologiialary jáne jasyl jelekter tobynyń jetekshisi Serikjan Suranshin Tóle bi 187 meken-jaiy boiynsha jasyl jelekterdi túgendeý 2018 jyldyń sáýirinde júrgizilgenin aitty. Onyń aitýynsha, osy ýchaskede sol kezde Sulpak ǵimaratynyń aldynda toǵyz emen jáne úsh akatsiia ósip turǵan.
Eske salaiyq, almatylyqtar aǵashtardyń kesilgenine narazylyq bildirgen edi. Jasyl ekonomika basqarmasynyń baspasóz qyzmeti men Sulpak kompaniiasynyń ókilderi osy jaǵdaiǵa qatysty pikir bildirgen bolatyn. Sol pikirinde "Arena S" (Sulpak saýda markasy) kompaniiasynyń ókilderi aǵashtar kesilgen aýmaq kompaniia menshigine jatpaitynyn málimdegen edi.
Keiinirek aǵashtardyń kesilýine bailanysty qala ákimdigi ókilderi pikir bildirip, 13 túp aǵashty zańsyz keskender jazalanǵanyn aitqan edi.
Bastapqyda qylmystyq is QK-niń 340-baby "aǵashtar men butalardy zańsyz kesý nemese joiý" boiynsha tirkeldi. Alaida keiin is QK-niń 339-baby ekinshi bóligine qaita saralandy. Is boiynsha negizgi aiyptalýshy JK basshysy. Ol osy jer ýchaskesin abattandyrý týraly kelisim jasaǵan.
19 naýryzda Almaty qalasynyń Almaly aýdandyq sotynda Sulpak dúkeniniń janynda aǵashtardy kesý boiynsha sot talqylaýy bastaldy. Sottalýshy kinásin ishinara moiyndady. Buǵan deiin kýágerler Sulpak dúkeniniń janynda aǵashtardy kesý týraly jańa málimet jariialaǵan edi.
